У брытанскім войску ўпершыню ў гісторыі жанчына стала парашутыстам-дэсантнікам
8- 19.02.2020, 18:09
- 9,777
Яна атрымала бардовы берэт.
Упершыню ў гісторыі ўзброеных сіл Вялікай Брытаніі жанчына прайшла курс парашутна-дэсантнага палка і атрымала бардовы берэт.
Пра гэта паведамляе «Еўрапейская праўда» са спасылкай на The Times.
28-гадовы капітан Розі Уайльд скончыла 21-тыднёвы курс, які заканчваецца васьмю складанымі выпрабаваннямі ўключна з жорсткім кулачным боем.
Congrats to Capt Rosie Wild of 7RHA. She’s the first woman to pass the gruelling P Company course. Here she is getting her beret after proving she’s nails pic.twitter.com/Zu9O5blOwF
— Jonathan Beale (@bealejonathan) February 18, 2020
Яна паспяхова скончыла складаны тыдзень выпрабаванняў, у тым ліку 60 секунд «кантраляванай фізічнай агрэсіі» супраць спаборніка мужчынскага полу такога ж росту і вагі. Падчас гэтага выпрабавання навабранцы наносяць адзін аднаму ўдары, не абараняючы сябе, каб праверыць мужнасць і баявы дух.
У рамках падрыхтоўкі таксама неабходна пераадолець у поўнай баявой выкладцы і з заплечнікам вагай 16 кг 3,2-кіламетровы марш-кідок менш чым за 18 хвілін, 16-кіламетровы марш не больш чым за 1 гадзіну 50 хвілін і марш 32 км менш чым за 4,5 гадзіны.
Цяпер Уайльд будзе служыць у сілах падтрымкі 16-й паветрана-дэсантнай брыгады.
Нагадаем, у 2018 годзе ў Брытаніі жанчынам дазволілі ўступаць у шэрагі ўсіх родаў войскаў. Абмежаванні на службу жанчын у войсках блізкага бою ў Брытаніі знялі ў 2016 годзе.