«Запасаў засталося на два месяцы»: у Расею не завезлі вопратку і абутак на вясну
25- 19.02.2020, 15:50
- 55,923
Сітуацыя знаходзіцца ў нявызначаным стане.
Эпідэмія каронавірусу ў Кітаі, праз якую амаль 100 млн чалавек выявіліся пад каранцінам, а прамысловыя прадпрыемствы спынілі канвееры, зрывае пастаўкі ў Расею адзення і абутку на вясну, паведамляе finanz.ru.
«Пастаўкі, якія павінны будуць адбыцца ў сакавіку - траўні, ужо часткова парушаныя», - паведаміла ТАСС генеральная дырэктарка Fashion Consulting Group Ганна Лебсак-Клейманс.
Паводле яе слоў, сітуацыя знаходзіцца ў нявызначаным стане: кампаніі, якія імпартуюць вопратку, не разумеюць, колькі прадоўжыцца каранцін і ці трэба шукаць альтэрнатыўных прадаўцоў.
На Кітай прыпадае блізу 40% усяго імпарту адзення і абутку ў Расею, а Бангладэш, які займае другое месца, адстае ў 6,5 разоў.
Кампаніі сапраўды вывучаюць альтэрнатыўныя магчымасці, але «экстраная перабудова лагістычных ланцужкоў - гэта дадатковыя выдаткі і нават рызыкоўны працэс», кажа Лебсак-Клейманс.
«Гэта значныя выдаткі і намаганні», перакласці якія на плечы ў цяперашняй эканамічнай сітуацыі будзе вельмі складана, падкрэслівае яна: у рэтэйлераў «з улікам нізкай пакупніцкай здольнасці насельніцтва існуюць праблемы ў стымуляванні продажаў».
Паводле інфармацыі ФМС, альтэрнатыўнымі пастаўшчыкамі тэкстылю, адзення і абутку з'яўляюцца Бангладэш, Італія, В'етнам, Турцыя, Беларусь, Узбекістан, Індыя, Камбоджа, Інданезія, Карэя, і Пакістан.
Таварных запасаў на складах у рытэйлераў засталося на 1,5-2 месяцы, ацэньвае Fashion Consulting Group. «Калі за гэты час кампенсуем затрымку тавару, то пакупнікі, хутчэй за ўсё, нічога не заўважаць, а ўсе выдаткі лягуць на плечы транспартных кампаній і пастаўшчыкоў», - разважае Лебсак-Клейманс. Але калі каранцін будзе прадаўжацца, а эпідэмію не возьмуць пад кантроль, гэта пачне адбівацца на цэнніках.
Страты расейскага бізнэсу ў сувязі з недаатрыманай прадукцыяй з Кітая за люты ацэньваюцца на мільярды даляраў, кажа кіраўнік грамадскай прыёмнай у замежнаэканамічнай дзейнасці пры бізнэс-амбудсмэне Масквы, чалец Грамадскага савета пры Федэральнай мытнай службе Расеі Аляксандр Сучкоў.
Рытэйлеры - не першыя ў спісе пацярпелых, найбольшыя страты панясе прамысловасць, якая працуе на кітайскіх камплектуючых, кажа ён: «Гэта будуць камплектуючыя для электронікі і гатовая электроніка, мэбля і збольшага абутковая прамысловасць; недаатрыманая прадукцыя будзе ацэньвацца на мільярды даляраў за люты, і будуць яшчэ недапастаўкі ў сакавіку».
На некаторых расейскіх заводах, якія закупляюць камплектуючыя, «складскія запасы ўжо змяншаюцца», прадаўжае Сучкоў: «Калі кітайскія прадпрыемствы не запусцяцца найбліжэйшым часам, гэта вельмі моцна ўдарыць і па бізнэсу, і па спажыўцах, бо тавары не будзе дзе набыць».