«Калі гутару на беларускай, то чамусьці раблюся дабрэйшым і весялейшым»
17- 19.02.2020, 10:15
- 11,666
Журналісты правялі сярод менчукоў апытанне да Дня роднай мовы.
Беларуская мова не стаіць на месцы: яна, як жывая стыхія, развіваецца разам з грамадствам і папаўняецца новымі сучаснымі словамі. Напрыклад, англіцызмамі – іх актыўна «пастаўляе» сфера сучасных тэхналогій. Ці ведаюць менчукі, што яны азначаюць? І ці размаўляюць яны на роднай мове? Напярэдадні Міжнароднага дня роднай мовы kp.by спытала пра гэта саміх беларусаў.
«Ведаю як на беларускай, а на расейскай – забыўся»
Пенсіянер Пётр уважае нашы загадкі элементарнымі і ліха перакладае амаль усе словы.
– Увогуле я часта размаўляю на беларускай мове. І чытаю – для мяне няма розніцы, на якой мове кніга.
«Наладзіў Вконтакте на беларускай мове»
Сістэмны адміністратар Сяргей успомніў пераклад усіх словаў. І патлумачыў, адкуль так добра ведае англіцызмы:
– У мяне проста «Укантакце» на беларускай мове, таму я ўвесь час з ёй сутыкаюся. Ды і ў навінах часцяком сустракаю беларускую мову.
«Калі са мной размаўляюць на беларускай, я ўсё разумею»
Філіп займаецца афармленнем помнікаў. Усё ягонае асяроддзе гаворыць па-расейску, як і сам хлопец:
– Але калі са мной размаўляюць на беларускай, я ўсё разумею, – растлумачыў ён і ўцёк на свае справы.
«Раней чытала лекцыi на беларускай мове»
Тамара Іванаўна не толькі ўспомніла, як перакладаюцца ўсе словы, але і больш за тое – па-беларуску патлумачыла, што яны азначаюць. «Суполка? Гэта грамадскае аб'яднанне». Пазней высветлілася, што жанчына – прафесарка, доктарка юрыдычных навук.
– Я спадзяюся, што нядрэнна ведаю беларускую мову. Размаўляю на ёй, калі трэба, напрыклад на працы. Калісьці я нават чытала лекцыі на беларускай мове.
«Калі гутару на беларускай, то чамусьці раблюся дабрэйшым і весялейшым»
Маркетолаг Аляксей шчоўкаў нашы пытанні, як арэшкі:
– Калі гутару на беларускай, то чамусьці раблюся дабрэйшым і весялейшым. Але часцей за ўсё на беларускай мове я толькі чытаю, а размаўляю на расейскай, – смяецца хлопец.