У Лідзе на вуліцах з'явіліся людзі ў ахоўных касцюмах

Што адбылося?

«Онлайнер» даслалі здымак, зроблены, мяркуючы па ўсім, ля паштовага аддзялення ў Лідзе: стаяць людзі ў ахоўнай вопратцы. Хутчэй за ўсё, хутка з'явяцца і іншыя трывожныя фотакарткі. Напраўду гэта вучэнні грамадзянскай абароны, пра якія папярэджвалі мясцовыя органы ўлады.

Вучэнні што да арганізацыі абароны насельніцтва ад надзвычайных сітуацый мірнага і ваеннага часу згодна з планам павінны прайсці з 17 да 21 лютага. Да манеўраў прыцягнуты ўсе раённыя службы, якія маюць дачыненне да ГА: медыкі, камунальнікі, міліцыя, энэргетыкі, аграрыі, прадпрыемствы гандлю і грамадскага харчавання, сувязісты, пажарныя.

Жыхароў і работнікаў прадпрыемстваў (як дзяржаўных, так і прыватных) загадзя папрасілі не панікаваць і быць гатовымі да ўключэнню ў працэс, з'яўлення нейкіх уводных. Відавочна, адзін з сцэнарыяў адпрацоўваецца і каля пошты.

У гэтым выпадку, удакладнілі ў Міністэрстве аховы здароўя, на фота патрапіла частка вучэнняў з удзелам супрацоўнікаў раённага аддзела аховы здароўя, а таксама мясцовага цэнтра гігіены і эпідэміялогіі.

У МНС паведамілі, што такія трэніроўкі праводзяцца кожныя 5-7 гадоў. Гэтым разам будуць адпрацаваныя 17 практычных і 2 тэарэтычныя ўводныя з «нарошчваннем абстаноўкі» (будуць «парушацца газазабеспячэнне», «падаць» апоры электраперадач, адбывацца «аварыі» на прадпрыемствах, «парушацца» дзейнасць аб'ектаў ЖКГ і гэтак далей).