МУС: Наркотыкі ў Беларусь ідуць у асноўным з Расеі

Пра гэта заявіў кіраўнік МУС Беларусі Караеў.

Колькасць перадазіровак сярод непаўналетніх за апошнія чатыры гады зменшылася ў 37 разоў. У Беларусі выяўляць гандляроў наркотыкамі і блакаваць доступ да інтэрнэт-кантэнту дапамагае інтэрнэт-выведка. Пра гэта на пасяджэнні Савета міністраў распавёў кіраўнік МУС Юрый Караеў, паведамляе прэс-служба ведамства.

Міністр унутраных спраў Юрый Караеў на пасяджэнні прэзідыума Савета міністраў 18 лютага ў Менску распавёў, што летась у 2,8 разы зменшылася колькасць перадазіровак наркотыкамі ў непаўналетніх, а ў параўнанні з 2015 годам - у 37 разоў.

З ягоных слоў, падлеткаў ва ўзросце да 18 гадоў, уцягнутых у наркаабарот, з кожным годам становіцца менш. Разам з тым многія з тых, хто ідзе на злачынства, робяць гэта свядома, з карысці і выдатна разумеюць, што парушаюць закон.

Асноўны шлях уцягвання падлеткаў у нарказлачынствы - гэта інтэрнэт. У сувязі з гэтым, адзначыў Караеў, МУС эфектыўна выкарыстоўвае магчымасці падраздзяленняў інтэрнэт-разведкі не толькі ў выяўленні і спыненні злачынстваў, але і ў блакаванні доступу да адпаведных сайтаў.

Каналы пастаўкі

У 2019 годзе органамі ўнутраных спраў выяўлена 4,5 тысячы нарказлачынстваў. З незаконнага абароту канфіскавана больш за паўтары тоны наркатычных сродкаў, псіхатропных рэчываў, іх прэкурсораў і аналагаў. Спынена 29 каналаў паставак наркотыкаў.

- Цяпер становішча ў сферы нелегальных паставак наркотыкаў з-за мяжы на ўнутраны рынак характарызуецца перавагай расейскага вектару, - паведаміў Караеў.

Разам з гэтым актывізавалася дзейнасць міжнародных злачынных груповак, якія з краін Еўразвязу вязуць на тэрыторыю ЕАЭС мараканскі гашыш. Павялічылася і колькасць транзітных паставак МDМА, мефедрону і какаіну, паведаміў кіраўнік МУС.