Радзільню №2 у Менску робяць інфекцыйнай бальніцай для хворых COVID-19

Статус бальніцы будзе зменены ўжо з 26 лістапада.

2-і радзільны дом Менска спыняе планавы прыём здаровых жанчын. Клініку перапрафілююць пад прыём пацыентаў з COVID-19.

Загад пра часовае спыненне шпіталізацыі цяжарных апублікавалі адразу некалькі практыкуючых акушэраў-гінеколагаў. Пазней у самой радзільні гэтую інфармацыю пацвердзілі, піша rebenok.by.

Статус бальніцы будзе зменены ўжо з 26 лістапада. Зараз у радзільным доме актыўна ідзе выпіска і перавод у іншыя бальніцы.

Цяжарных і парадзіх, раней замацаваных за 2-й радзільняй, размяркуюць па іншых бальніцах - у РНПЦ «Мацi i дзiця», радзільню бальніцы №3 імя Клумава, радзільню бальніцы №1.

Дарэчы, раней для здаровых пацыентак у Менску зачынілася 6-я радзільня. Зараз там прымаюць толькі цяжарных і парадзіх з станоўчым тэстам на каранавірус, а таксама цяжарных з пнеўманіяй, кантакты першага ўзроўню з прыкметамі ВРВІ і ліхаманкай (без выніку абследавання). Сюды ж перавядуць цяжарных і парадзіх з іншых радзільняў, калі падчас лячэння ў іх выявяць COVID-19.