23 студзеня 2021, Субота, 7:33
Сім сім, Хартыя 97!
Рубрыкі

Студэнты, якія навучаюцца ў Польшчы, не змаглі перасекчы мяжу і вярнуцца ў Беларусь

9
Студэнты, якія навучаюцца ў Польшчы, не змаглі перасекчы мяжу і вярнуцца ў Беларусь

Журналісты высвятлялі, што адбылося.

Увечары 30 кастрычніка 11 беларускіх студэнтаў спрабавалі вярнуцца дадому праз памежны пераход «Брэст», але іх не прапусцілі і адправілі назад у Польшчу.

Увечары ў пятніцу ў адной з сацыяльных сетак з'явілася паведамленне аб тым, што на мяжы ў Берасці затрымаліся маладыя беларусы, якія навучаюцца ў Польшчы. Пра гэта блізу 22.00 паведаміў на сваёй старонцы адзін з іх бацькоў. Рэдакцыя «Брестской газеты» звязалася з берасцейцам.

Мужчына распавёў, што ягоная дачка вярталася з Польшчы на маршрутцы з Бяла-Падляскі і да таго моманту ўжо 5 гадзін стаяла на мяжы з Беларуссю. У шасці студэнтаў, якія ехалі разам з ёй, забралі пашпарты і нічога не патлумачылі. Маладзёны сядзелі ў мікрааўтобусе і чакалі, калі іх прапусцяць.

Са слоў суразмоўцы, да 23.30 аўтобус вярталі тры разы. Бацькі студэнтаў (амаль 10 чалавек) аператыўна сабраліся каля памежнага пераходу «Брэст» (Варшаўскі мост). Яны падышлі да памежнікаў і спрабавалі разабрацца з сітуацыяй, у якую трапілі іх дзеці. Але адказу на свае пытанні ад памежнікаў не атрымалі.

Суразмоўца растлумачыў, што з іншага аўтобуса высадзілі чацвярых студэнтаў. Тым часам аўтобус з ягонай дачкой разгарнулі чарговым разам. Ён прастаяў на нейтральнай паласе яшчэ некалькі гадзін, бо ні беларускі, ні польскі бакі не прапускалі яго да сябе.

А 23.56 афіцыйны прадстаўнік Берасцейскай памежнай групы Сяргей Дзмітрыеў паведаміў у лісце, які прыйшоў на электронную пошту журналістаў, што Польшча адмаўляе ва ўездзе беларускім студэнтам.

«Увечары 30 кастрычніка на ўезд у Рэспубліку Беларусь накіроўвалася група беларускіх студэнтаў, якія вяртаюцца з Польшчы. Памежнікі папярэдзілі маладзёнаў, што іх чакае 10-дзённая самаізаляцыя. Бо навучэнцам трэба было вярнуцца ў ВНУ ўжо 4 лістапада, ім было прапанавана вярнуцца ў сумежную дзяржаву. Аднак польскі бок адмовіў студэнтам ва ўездзе без тлумачэння прычын. Цяпер маладзёны спадзяюцца вярнуцца да месца вучобы», – напісаў Сяргей Дзмітрыеў.

Позна ўначы бацька адной са студэнтак паведаміў рэдакцыі, што «11 дзяцей вярнуліся ў Польшчу».

Больш падрабязна аб гэтай сітуацыі распавёў Дзмітрый - адзін з сямі студэнтаў, які быў у гэтым аўтобусе.

«У пятніцу дзесьці а 17.40 паводле беларускага часу мы пад'ехалі да памежнікаў. Памежнік у мяне спытаў, адкуль я еду і што рабіў у Польшчы. Я адказаў: «Я там вучуся». У мяне папрасілі пацверджанне. Я паказаў студэнцкія дакументы. У мяне іх адсканавалі і сказалі: «Чакайце». Наколькі я разумею, хлопцы прайшлі такую ж працэдуру. Потым мы дзесьці гадзіну сядзелі ў маршрутцы, да нас падышлі і сказалі, што ў сувязі з эпідэміялагічнай сітуацыяй нас не прапусцяць», – распавёў студэнт.

Дзмітрый бачыў, як у Беларусь заязджалі іншыя аўтамабілі з беларусамі. Таму яны вярнуліся ў канец чаргі і паспрабавалі прайсці мяжу зноўку.

«Наша чарга падышла недзе праз тры гадзіны, але нас зноў не прапусцілі. Мы казалі, што раніцай у СМІ быў артыкул, дзе напісана, што беларусаў прапускаюць. Нам адказалі - гэта было раніцай, усё мяняецца», - сказаў хлопец.

А 00.37 31 кастрычніка ён паведаміў, што траіх чалавек, якіх яны пасадзілі ў спадарожнікі, не пусцілі ў Беларусь. У гэты час з беларускага боку памежнага пераходу студэнтаў безвынікова чакалі бацькі, пра якіх мы пісалі раней.

Дарэчы, афіцыйны прадстаўнік Дзяржпамежкамітэта Беларусі Антон Бычкоўскі пракаментаваў сітуацыю амаль рыхт-у-рыхт, як раней Сяргей Дзмітрыеў:

«Памежнікі папярэдзілі студэнтаў, што іх чакае 10-дзённая самаізаляцыя. Бо навучэнцам трэба было вярнуцца ў ВНУ ўжо 4 лістапада, ім было прапанавана вярнуцца ў сумежную дзяржаву. Аднак польскі бок адмовіў студэнтам ва ўездзе без тлумачэння прычын. На існы момант яны зноў спрабуюць уехаць назад у Польшчу».

Студэнт распавёў, што ў яго не пыталіся, колькі ён плануе быць у Беларусі.

«У мяне не пыталіся пра тое, колькі я планую быць у Беларусі. Я еду дадому па цёплыя рэчы і гатовы адседзець 10-дзённы карантын. Хлопцы таксама. У іх дыстанцыйнае навучанне, яны планавалі быць дома нават даўжэй, чым 10 дзён», - сказаў Дзмітрый.

Аляксандр, іншы суразмоўца, распавёў, што бацькам дазволілі перадаць ежу і ваду дзецям. Пасля дзвюх ночы бацькі зразумелі, што іх дзяцей не прапусцяць у Беларусь. Тыя ў выніку вярнуліся ў Польшчу. Праўда, вярталася іх ужо не сем, а 11.

«Пакуль дзеці чакалі, да іх у маршрутку падсадзілі яшчэ чацвярых студэнтаў, якіх таксама не прапусцілі. Па вяртанні ў Польшчу яны без праблем прайшлі мяжу. Так атрымалася, што студэнты, якія ехалі ў Беларусь з Любліна, жывуць у нейкім прыватным інтэрнаце, які забралі «пад каранавірус». Уначы па прыездзе ім нават не было куды вяртацца. Таму нашы прытулілі іх у сябе ў інтэрнаце ў Бяла-Падлясцы», - распавёў Аляксандр.

Нагадаем, 29 кастрычніка сталі паступаць паведамленні, што беларусы не могуць вярнуцца ў краіну з Польшчы, Літвы, Латвіі і Украіны. У Дзяржпамежкамітэце тлумачылі, што для асобнай катэгорыі фізічных асоб часова абмежаваны ўезд з краін-суседак праз наземныя пункты пропуску. Прычына - эпідэмічная абстаноўка.

Пазней Антон Бычкоўскі заявіў, што беларусаў на тэрыторыю нашай краіны пускаюць.

«Ёсць абмежаванні ў дачыненні да фізічных асоб, якія прыбываюць і плануюць прыбываць з тэрыторый суседніх з намі дзяржаў. Ёсць паўнамоцтвы ў памежнікаў прымаць у тым ліку і прыватныя пастановы ў залежнасці ад сітуацыі, якая складваецца з ахвотнымі перасячы мяжу», — сказаў прадстаўнік ДПК.

Ніякага дакумента, які тлумачыць сітуацыю на мяжы, няма дагэтуль.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».