«Залатыя пашпарты»: Еўракамісія запусціла працэдуру парушэнняў супраць Кіпра і Мальты

У кіпрскага і мальтыйскага ўрадаў ёсць два месяцы, каб адказаць на прэтэнзіі ЕК.

Еўрапейская камісія пачала расследаванне ў дачыненні да Кіпра і Мальты ў сувязі з магчымымі парушэннямі ў іх схемах атрымання грамадзянства для інвестараў, так званых схем «залатых пашпартоў».

Як паведамляе «Европейская правда», адпаведная заява размешчаная на сайце Еўракамісіі.

Еўракамісія запусціла працэдуру парушэння правоў супраць Кіпра і Мальты, разаслаўшы лісты з афіцыйным паведамленнем пра іх схемы.

Камісія ўважае, што выдача гэтымі дзяржавамі-сябрамі іх грамадзянства - і, такім чынам, грамадзянства ЕЗ - у абмен на загадзя пэўны плацёж або інвестыцыі і без рэальнай сувязі з зацікаўленымі дзяржавамі-сябрамі, несумяшчальная з прынцыпам шчырага супрацоўніцтва, замацаванага ў дамове ЕЗ.

На думку Брусэля, праз характар грамадзянства ЕЗ такія схемы маюць наступствы для Звязу агулам. Калі дзяржава-сябра выдае грамадзянства, адпаведная асоба аўтаматычна становіцца грамадзянінам ЕЗ і карыстаецца ўсімі правамі, звязанымі з гэтым статусам, такімі як права перасоўвацца, пражываць і працаваць у межах ЕЗ або права галасаваць на муніцыпальных выбарах, а таксама мае права голасу на выбарах у Еўрапарламент.

У кіпрскага і мальтыйскага ўрадаў ёсць два месяцы, каб адказаць на лісты з афіцыйным паведамленнем. Калі адказ не задаволіць Камісію, яна можа вынесці матываванае меркаванне ў гэтым пытанні.

Камісія часта выказвала сур'ёзную заклапочанасць з нагоды схем атрымання грамадзянства інвестарамі і пэўных рызык, уласцівых такіх схемам. Гэтыя рызыкі звязаны, між іншым, з бяспекай, адмываннем грошай, ухіленнем ад выплаты падаткаў і карупцыяй.

Нагадаем, аўдытарская служба Кіпра ў сваёй справаздачы нядаўна заявіла, што тысячы пашпартоў маглі быць выдадзены без належнага дазволу ў рамках схемы грамадзянства ў абмен на інвестыцыі.