Святлана Ціханоўская абвясціла супрацоўнікам сілавых структур дэдлайн пераходу на бок народа

Да Народнага ультыматуму засталося пяць дзён.

Святлана Ціханоўская звярнулася да супрацоўнікаў сілавых структур Беларусі:

«25 кастрычніка мы абвясцілі Народны ультыматум. І я хачу звярнуцца да супрацоўнікаў сілавых ведамстваў.

Вы звыклі выконваць загады. Але павінны разумець, што неўзабаве загады будуць гучаць ад новай, дэмакратычнай улады. Гэта непазбежна.

Вы звыклі слухаць сваё начальства. Але ці варта рабіць гэта, калі яно абараняе не народ Беларусі, а толькі аднаго чалавека? Гэта незаконна.

Вы звыклі праяўляць салідарнасць з калегамі. Але вы не несяце калектыўную адказнасць за злачынствы, якія чынілі яны, а не вы. Калі ваш калега збіў кагосьці да паўсмерці, гэта не вы павінны сесці ў турму.

Народны ультыматум - гэта ваш шанец стаць на бок беларусаў. Калі вы не згодныя выконваць злачынныя загады - не рабіце гэтага. Рэжым ведае, што памірае - і спрабуе падзяліць сваю долю з усімі вамі, запэцкаўшы гонар вашай формы. Не дапусціце гэтага. Адказнасць панясуць персанальна тыя, хто чыніў злачынствы. Пагалоўнай люстрацыі не будзе. У новай Беларусі патрэбна ваша праца, патрэбна сістэма сілавых ведамстваў. Таму звяжыцеся з намі, з фондамі, зрабіце публічны зварот з падтрымкай свайго народа. Выканайце прысягу, якую кожны з вас даваў беларусам. Да Народнага ультыматуму засталося 5 дзён».