Самы багаты чалавек Украіны набыў маёнтак караля Бельгіі
9- 28.01.2020, 9:31
- 17,063
Кампанія мільярдэра разглядае актыў як «доўгатэрміновую інвестыцыю».
Украінскі мільярдэр Рынат Ахметаў, уладальнік інвесткампаніі SCM Holdings Limited, набыў у італьянскага вытворцы вінаў і безалкагольных напояў Campari Group вілу Les Cedres у Францыі, паведамляе РБК.
«Кампанія разглядае актыў як доўгатэрміновую інвестыцыю», – гаворыцца ў заяве SCM. Там не ўдакладнілі, ці будзе Ахметаў выкарыстоўваць маёнтак як прыватную рэзідэнцыю.
Як паведамляюць Bloomberg і Financial Times, сума ўгоды склала € 200 млн ($ 220 млн).
Маёнтак з 14 спальнямі знаходзіцца ў камуне Сэн-Жан-Кап-Фэры ў рэгіёне Праванс на паўднёвым усходзе Францыі. Віла размешчаная на тэрыторыі плошчай 14 тыс. га. Яна была пабудаваная ў 1870 годзе, у 1904 годзе яе набыў бельгійскі кароль Леапольд II. У 1920-я маёнтак прадалі сям'і Марна-Лапастоль, вытворцам каньячнага лікёру Grand Marnier.
У 2016 годзе Campari набыла Grand Marnier Group, тады ж італьянскай кампаніі перайшоў і маёнтак.
Ахметава называюць самым багатым чалавекам ва Украіне. Паводле звестак Forbes, ягоная маёмасць ацэньваецца на $ 6,7 млрд. Часопіс змясціў яго на 272 радок у глабальным спісе найбагацейшых людзей свету.