У Віцебску затрыманыя актывісты «Еўрапейскай Беларусі»
8- 27.01.2020, 21:38
- 21,221
На Алеся Круткіна і Наталлю Спірыдонаву склалі пратаколы.
У панядзелак 27 студзеня супрацоўнікі міліцыі затрымалі двух актывістаў грамадзянскай кампаніі «Еўрапейская Беларусь». Алеся Круткіна і Наталля Спірыдонава даставілі ў РАУС Кастрычніцкага раёна Віцебска, дзе абвінавацілі ў расклейцы ўлётак, якія з'явіліся раней у цэнтры горада, паведамляе тэлеграм-канал «Еўрапейскай Беларусі».
Як паведаміла Наталля Спірыдонава, на затрыманых склалі пратаколы паводле артыкула 17.1 КоАП. Пасля складання пратаколу ў Кастрычніцкім РАУС актывістку адвезлі ў Першамайскі РАУС, дзе на яе быў складзены другі пратакол паводле артыкула 23.14 КоАП.
Наталлю Спірыдонаву вызвалілі праз тры гадзіны пад падпіску ў сувязі з тым, што ў яе на ўтрыманні знаходзіцца маці-інвалід. Алесь Круткін пасля афармлення пратакола адпраўлены ў ІЧУ да суда. Пратакол паводле 17.1 КоАП быў складзены старэйшым інспектарам Кастрычніцкага РАУС маёрам міліцыі Васіленкам Юрыем Канстанцінавічам. Пратакол паводле 17.1 КоАП склаў старшы ўчастковы, маёр міліцыі Казлоўскі Уладзімір Анатольевіч.