Міхаіл Жамчужны паведаміў важныя навіны
2- 25.01.2020, 10:46
- 13,904
Пры гэтым палітвязень падзякаваў беларусам за падтрымку і дапамогу.
Як стала вядома праваабаронцам «Вясны», пасля адбыцця трох месяцаў у памяшканні камернага тыпу палітвязень Міхаіл Жамчужны неаднаразова быў змешчаны ў ШІЗА. З 20 студзеня зняволены зноў накіраваны ў ПКТ, паведамляе spring96.org.
Так, 23 снежня 2019 года за адмову пераходзіць у атрад Міхаіл Жамчужны быў пакараны 7 днямі штрафнога ізалятара, адразу пасля выхаду яму было прызначана яшчэ 10 дзён ШІЗА. З 10 студзеня палітвязень зноў адбываў 10 дзён у ШІЗА. Пасля гэтага Міхаілу Жамчужнаму на той жа падставе прызначылі спагнанне - тры месяцы ПКТ. Там асуджаны будзе знаходзіцца прыблізна да 20 красавіка, і ён рады гэтаму, бо цяпер зможа весці перапіску, атрымліваць пошту, набываць прадукты, хадзіць на шпацыр кожны дзень.
У апошнім лісце да віцебскіх праваабаронцаў палітвязень Міхаіл Жамчужны выказвае меркаванне, што грамадства губляе цікавасць да яго. Моцная плынь карэспандэнцыі, якую атрымліваў годам раней, ператварыўся ў рэдкія лісты.
Міхаіл Жамчужны адзначае, што апошнім часам начальнік папраўчай калоніі ставіцца да яго больш мякка: раней зняволенаму трэба было адбыць 80-100 дзён у ШІЗА, а ПКТ прызначалі не больш, чым на месяц. Цяпер Міхаіл Жамчужны сядзіць 23-27 дзён у ШІЗА, а ў ПКТ - па тры месяцы. Палітвязень па-ранейшаму прадаўжае абскарджваць вынесеныя спагнанні, на сёння іх у яго - 74.
Мужчына выказвае занепакоенасць тым, што не ўсе людзі, з кім ён лістуецца, адказваюць на ягоныя лісты. Магчыма, гэта складна з цэнзурай і наўмысным знішчэннем карэспандэнцыі адміністрацыяй калоніяй.
Міхаіл Жамчужны зноў дзякуе ўсім за падтрымку і дапамогу.