SpaceX паспяхова пратэставала касмічны карабель Сrew Dragon
24- 19.01.2020, 21:24
- 16,324
Кампанія Ілана Маска правяла фінальны тэст капсулы перад адпраўкай людзей у космас.
19 студзеня 2020 года а 17-й паводле кіеўскага часу кампанія SpaceX Ілана Маска правяла фінальны тэст касмічнага карабля і выпрабавала сістэму аварыйнага адлучэння капсулы ад ракеты ў палёце, піша nv.ua.
Назіраць за падзеяй можна было ў наўпростай трансляцыі на YouTube-канале SpaceX і вэб-сайце NASA.
Капсулу Crew Dragon запусцілі на ракеце Falcon 9 з Касмічнага цэнтра Кэнэдзі ў Флорыдзе, і на 88 секундзе пасля ўзлёту яна аўтаматычна адстыкавалася з дапамогай васьмі рухавікоў SuperDraco.
Пасля гэтага касмічны карабель з дапамогай парашутаў паспяхова вярнуўся на Зямлю і сеў у Атлантычным акіяне за 30 км ад узбярэжжа Флорыды, дзе Crew Dragon ужо чакалі ратавальнікі.
На гэты раз у капсуле былі два манекены, але наступным этапам для SpaceX ужо праз некалькі тыдняў павінен стаць першы пілатаваны палёт Crew Dragon з двума астранаўтамі NASA на борце да Міжнароднай касмічнай станцыі.
Раней кампанія перанесла фінальны тэст аварыйнага адлучэння касмічнага карабля з 18 на 19 студзеня праз моцны вецер і высокія хвалі ў зоне пошуку капсулы ў акіяне.