У Маскве прайшло масавае шэсце супраць фашызму і змяненняў Канстытуцыі
18- 19.01.2020, 17:03
- 63,516
(Абноўлена) Акцыя мела шырокі агульнадэмакратычны парадак дня.
У Маскве прайшло ўзгодненае з уладамі шэсце памяці забітых неанацыстамі 11 гадоў таму адваката Станіслава Маркелава і журналісткі Анастасіі Бабуравай, а таксама іншых ахвяр палітычных і ксенафобных злачынстваў.
Радыё Свабода вяло жывую трансляцыю шэсця:
На акцыі затрыманыя больш за дзесяць чалавек.
Паліцыянты выхоплівалі іх з натоўпу падчас руху калоны і вялі ў аўтазакі. Пра прычыны затрыманняў пакуль не паведамляецца. Вядома, што актывіст Канстанцін Фокін быў затрыманы яшчэ да пачатку шэсця за плакат, на якім было напісана "Пуцін, сыходзь!".
У астатнім шэсце прайшло без інцыдэнтаў. Яго ўдзельнікі, акрамя ўскладання кветак на месцы загубы Маркелава і Бабуравай, выказалі пратэст супраць пераследаў палітычных актывістаў, катаванняў і рэпрэсій. Арганізатары акцыі адзначылі, што калі раней асноўная пагроза антыфашыстам зыходзіла ад нэанацыстаў, то цяпер яна зыходзіць ад улады. У пацвярджэнне гэтаму яны неслі плакаты з фотаздымкамі абвінавачаных паводле справы так званай тэрарыстычнай супольнасці "Сетка", большасць з якіх з'яўляюцца анархістамі і актывістамі руху антыфа. Паплечнікі абвінавачаных разглядаюць гэтую крымінальную справу за цалкам сфабрыкаваную ФСБ.
Некаторыя ўдзельнікі шэсця неслі ў руках канстытуцыю Расеі на знак пратэсту супраць "канстытуцыйнага перавароту", якім яны называюць прапанаваныя прэзідэнтам Уладзімірам Пуціным папраўкі да асноўнага закону краіны.
Раней маскоўская муніцыпальная дэпутатка Юлія Галяміна прапанавала пашырыць парадак шэсця памяці Маркелава і Бабуравай, абвясціўшы аб пачатку кампаніі "супраць дзяржаўнага перавароту". У суботу супрацоўнікі паліцыі зачыталі ёй перасцярогу аб недапушчальнасці правядзення няўзгодненых акцый. У сваю чаргу, арганізатары сённяшняга шэсця падкрэслівалі, што не супраць удзелу ў ім абаронцаў канстытуцыі, але папярэдзілі, што яго асноўная тэматыка і лозунгі не мяняюцца.
Усяго ў сталым ужо традыцыйным антыфашысцкім шэсці памяці Маркелава і Бабуравай узялі ўдзел блізу паўтары тысячы чалавек.
К 14:30 на территорию шествия #памятиМаркеловаБабуровой прошли 1,33 тыс. участников.
— #БелыйСчётчик (@WhiteCounter) 19 января 2020 г.
Пропускали быстрее, очередь за рамками закончилась.
Шествие ждало задерживавшихся.
Подсчет продолжается.
#БелыйСчётчик pic.twitter.com/2Rv6Od0UUP
Маючы левыя погляды адвакат Станіслаў Маркелаў і журналістка "Новай газеты" Анастасія Бабурава былі забітыя ў цэнтры Масквы 19 студзеня 2009 года. Вінаватымі ў іх забойстве былі прызнаныя Нікіта Ціханаў і Яўгенія Хасіс, а арганізатарам - Ілля Гарачоў. Усе яны былі сябрамі неанацысцкай арганізацыі БОРН.