У Паўночнай Карэі змяніўся міністр замежных спраў
4- 19.01.2020, 12:33
- 22,994
Прызначэнне можа сігналізаваць аб змене палітыкі Пхеньяна ў дачыненні да ЗША і Паўднёвай Карэі.
Міністрам замежных спраў Паўночнай Карэі прызначаны Ры Сон Гвон.
Як паведамляе карэйскае агенцтва Yonhap, раней чыноўнік займаў пасаду кіраўніка «камітэта ў мірным аб'яднанні краіны».
Прызначэнне новага міністра можа сігналізаваць аб змене палітыкі Пхеньяна ў дачыненні да ЗША і Паўднёвай Карэі. Ры Сон Гвон зменіць на пасадзе міністра Ры Ёнг Хо, які ўзначальваў замежнапалітычнае міністэрства з 2016 года. СМІ ўважаюць Гвона за адну з ключавых фігур у дачыненнях Пхеньяна і Сеула.
Нагадаем, 31 снежня лідар Паўночнай Карэі Кім Чэн Ын заявіў, што КНДР у найбліжэйшай будучыні прадэманструе «новую стратэгічную зброю».
Ён таксама прыстрашыў абраць «новы шлях», калі Вашынгтон не зможа пайсці на саступкі ў сваіх перамовах аб дэнуклеарызацыі, намякаючы на тое, што Пхеньян пакладзе канец дыпламатыі і вернецца да правакацыйных дзеянняў.
У адказ прэзідэнт ЗША Дональд Трамп заявіў, што Кім Чэн Ын пагадзіўся на дэнуклеарызацыю Карэйскага паўвострава ў 2018 годзе і «падпісаў адпаведнае пагадненне».
У студзені ЗША ўвялі новыя санкцыі супраць Паўночнай Карэі.