«Дзесяць, дзевяць, восем секунд, і раптам - бум»: Трамп распавёў, як ліквідавалі Сулеймані

Вайскоўцы вялі для прэзідэнта ЗША зваротны адлік.

Прыкладна за два тыдні да спецаперацыі ЗША ўстанавілі назіранне за іранскім камандзірам спецпадраздзялення «Кудс» Касем Сулеймані.

Вайскоўцы вялі для лідара ЗША Дональда Трампа зваротны адлік да гібелі генерала, распавёў сам Трамп падчас прыватнай вячэры для спонсараў Рэспубліканскай партыі ў сваёй сядзібе Мар-а-Лага ў Фларыдзе, паведамляюць The Washington Post і CNN.

Са слоў Трампа, ён штохвілінна сачыў за аперацыяй, знаходзячыся ў сітуацыйным пакоі Белага Дома. Яму дакладвалі, колькі хвілін і секунд заставалася да гібелі генерала.

«Сулеймані засталося жыць дзве хвіліны і 11 секунд, сэр. Яны ў машыне, яны ў браняваным аўтамабілі. Дзесяць, дзевяць, восем секунд... І раптам, бум», - распавядаў Трамп, адзначаючы, што вайскоўцы назіралі за ударам з дапамогай камер «у небе» і апісвалі прэзідэнту ЗША тое, што самі бачылі.

Сулеймані казаў «дрэнныя рэчы» пра ЗША, растлумачыў Трамп. «Нібыта мы збіраемся іх атакаваць, збіраемся забіць вашых людзей. Я сказаў: «Паслухайце, колькі яшчэ гэтага глупства мы павінны выслухаць, праўда?», - адзначыў лідар ЗША. Ён таксама назваў Сулеймані «бацькам прыдарожнай бомбы» і паклаў на яго адказнасць «за кожнага прыгожага юнака ці дзяўчыну без рук або ног, якіх вы бачыце на вуліцы».

Нагадаем, Сулеймані быў забіты 3 студзеня ў раёне аэрапорта Багдада ў ходзе спецаперацыі амерыканскіх вайскоўцаў.