Дарожны падатак: за грошы кіроўцаў вядуць дзіўную гульню

Чаму ўлады адпрэчваюць ініцыятывы аўтамабілістаў?

Дарожны падатак у Беларусі не будуць прывязваць да прабегу транспартнага сродку

Адказ на свой зварот атрымалі кіроўцы, якія выступілі з такой прапановай, паведамляе blizko.by.

Яны пісалі:

- Які год вядзецца абмеркаванне дарожнага падатку, так і не атрымаўшы развязання, якое задавальняла б вялікую частку кіроўцаў. Яны просяць увесці плату ў паліва і справядліва адзначаюць, што аплата не суразмерная фактычнаму выкарыстанню дарог. Пры гэтым дзяржава адхіляе гэтую просьбу і аргументуе гэта агульным павелічэннем коштаў прадукцыі.

Улічваючы нашы прэтэнзіі, мы прапануем дзве змены для праходжання тэхагляду і аплаты дарожнага падатку:

Кошт дарожнага падатку вылічваць з прабегу транспартнага сродку паміж інтэрваламі тэхагляду (раз на год, раз на два гады або кожныя 20-10 тысяч кіламетраў)

Замяніць часовыя інтэрвалы на рэальны прабег аўтамабіля, як у аўтамабільных вытворцаў, напрыклад, 10 тысяч і прыбраць мяжу 10 гадоў для памяншэння інтэрвалу праходжання тэхагляду.

Адказ з Міністэрства фінансаў прыйшоў. Яго падпісаў намеснік міністра Дзмітрый Кійко. Ён паведаміў:

- Збіранне «дарожнага падатку» на падставе прабегу транспартнага сродку не пажаданае ў сувязі з немагчымасцю ажыццяўлення дакладнага кантролю за яго фактычнымі значэннямі, бо магчымыя розныя злоўжыванні.

Ужо працяглы час беларускія ўлады вядуць вакол дарожнага падатку дзіўную гульню, якая аплачваецца грашыма кіроўцаў. Яшчэ 27 снежня мінулага года намеснік прэм'ер-міністра Уладзімір Кухараў на сустрэчы з калектывам Баранавіцкага завода аўтаматычных ліній заявіў, што канчатковая пастанова аб магчымасці раздзялення ў Беларусі транспартнага падатку і працэдуры тэхагляду аўтамабіляў будзе прынятая ў пачатку 2020 года.

Аднак ніякай пастановы што да гэтага пытання пакуль не было. Незалежныя экспэрты адзначаюць, што галоўным каменем перапоны магло стаць банальнае нежаданне ўладаў пазбаўляць сябе даходаў, што атрымліваюцца за кошт беларускіх кіроўцаў.

І сапраўды, у 2020 годзе з кіроўцаў ужо запланавана сабраць 301,3 млн руб дарожнага падатку. Пра гэта гаворыцца ў тлумачальнай запісцы да праекту закона «Аб бюджэце» на будучы год, паведамілі «Минск-Новости».

Згодна з планамі, у 2020 годзе даходы рэспубліканскага дарожнага фонду складуць 616,4 млн руб. З бюджэту будзе накіравана яшчэ 156,5 млн руб.

Асноўнымі крыніцамі даходу рэспубліканскага дарожнага фонду стануць сродкі дзяржпадатку за выдачу дазволу на допуск транспартнага сродку да ўдзелу ў дарожным руху - гэта 301,3 млн руб. Акрамя таго, за праезд транспартных сродкаў платнымі аўтамабільнымі дарогамі плануецца сабраць 268,9 млн руб.

З рэспубліканскага дарожнага фонду ў кансалідаваны бюджэт Менска выдзеляць за 3,7 млн рублёў, Берасцейскай вобласці - 26 млн рублёў, Вiцебскай - 22,7 млн, Гомельскай - 23,2 млн, Гарадзенскай - 22,7 млн, Менскай - 36,1 млн, Магілёўскай вобласці - 15,9 млн. Агульная сума накіраваных субвенцый складзе 150,6 млн руб.