Астрафізікі ўпершыню знайшлі ў атмасферы экзапланеты калій

Адкрыццё здзейснілі навукоўцы Патсдамскага астрафізічнага інстытута.

Спектраскапічны аналіз высокага разрознення дазволіў супрацоўнікам Патсдамскага астрафізічнага інстытута выявіць калій у газавай абалонцы экзапланеты. Гаворка ідзе, як удакладняе навуковае выданне Monthly Notices of the Royal Astronomical Society: Letters (пераклад - planet-today.ru), пра першае выяўленне калію ў атмасферы планеты за межамі Сонечнай сістэмы.

Яшчэ два дзясяткі гадоў таму астраномы лічылі, што калій і натрый павінны прысутнічаць у атмасферах так званых «гарачых юпітэраў» - газавых гігантаў, размешчаных блізка да сваіх зорак. Натрый і праўда атрымалася выявіць у абалонцы такіх планет ужо досыць даўно, а вось калій усё не знаходзіўся.

«Элементы, з якіх складаецца атмасфера той ці іншай экзапланеты, можна вывучыць, калі планета аказваецца паміж намі і дыскам свайго свяціла. І ўсё бы нічога, але шчыльныя аблокі ў атмасферах гарачых юпітэраў перашкаджаюць спектральнаму аналізу», - распавядаюць даследнікі.

Калій не ўдавалася выявіць нават у атмасферы планеты HD189733b, якая аддаленая ад нас усяго на шэсцьдзесят чатыры светлавыя гады і з'яўляецца самым вывучаным на сённяшні дзень гарачым юпітэрам. Але цяпер, калі астраномы ўжылі новы інструмент - спектраскапічны аналізатар PEPSI Вялікага бінакулярнага тэлескопа - калій усё ж такі адшукаўся ў атмасферы гіганта.