Як хлопец з Баранавічаў стаў вырабляць знадворную рэкламу

Мантаж даводзіцца выконваць пры ўсякім надвор'і.

Максім Сафонаў займаецца вырабам знадворнай ды інтэр'ернай рэкламы. Прадпрымальнік расказаў intex-press.by, колькі грошай давялося ўкласці ў старт уласнага бізнэсу, з якімі складанасцямі сутыкаецца і ў чым зарука поспеху ўсялякай ініцыятывы:

- Звязаць сваё жыццё з рэкламнай дзейнасцю мне хацелася заўсёды. Па-першае, гэта стасункі з людзьмі, а па-другое, творчасць і самавыяўленне. А ўсё пачалося досыць банальна.

Аднойчы зайшоў да таварыша ў рэкламную фірму, мяне папрасілі дапамагчы, а потым прапанавалі застацца. Я пагадзіўся і прапрацаваў у гэтай фірме шэсць гадоў.

Займацца рэкламным бізнэсам у якасці ІП я пачаў з 2006 года. Стварыць сваю справу мяне падштурхнула жаданне быць незалежным - каб можна было самастойна зарабляць грошы і пры гэтым размяркоўваць час з ўласнага жадання.

Памяшканне і начынне

Нягледзячы на атрыманы досвед, пачынаць сваю справу было нялёгка. Трэба прадумаць план працы, бо фіксаванага даходу ў гэтай галіне быць не можа: сёння ёсць кантракт, заўтра - не. Я таксама спрабаваў разлічыць свой прыкладны даход, каб разумець, ці стане яго на сацыяльныя адлічэнні, падаткі, арэнду памяшкання, набыццё патрэбных матэрыялаў і паліва для аўтамабіля.

Таксама трэба было знайсці памяшканне і набыць інструменты. Памяшканне патрабавалася прасторнае і ацяплянае, куды можна было б без праблем унесці і вынесці велізарныя канструкцыі. На пошукі пайшоў немалы час, але я ўсё ж такі знайшоў памяшканне. За арэнду разам з камунальнымі паслугамі штомесяц плачу блізу 200 рублёў.

Начынне купляў пакрысе, а варштат зрабіў сам. Таксама набыў бус, каб было на чым перавозіць матэрыялы. У цэлым на старт уласнага праекта пайшло крыху больш за дзве тысячы даляраў.

Першы выраб - для знаёмца

Мой першы самастойны выраб - шыльда для крамы адзення ў горадзе Слоніме. Гэта была замова ад майго знаёмца. Пасля з'явіўся новы кліент - таксама слонімскі: спатрэбілася шыльда для «Белдзяржстраха».

І надалей большасць кліентаў прыходзіла, даведаўшыся пра мяне праз пагалоску. Сярод найбольш цікавых работ магу адзначыць шыльды для велакрамы «Райдэр», казіно «КІМ».

Хочуць хутка і нядорага

Як і кожная праца, мая таксама мае свае асаблівасці і цяжкасці.

Першая складанасць у тым, што неабходныя матэрыялы ў Баранавічах не купіш - іх трэба набываць і прывозіць. Другая складанасць - гэта мантаж рэкламы, які выконваецца пры ўсякім надвор'і, на пэўнай вышыні, ды яшчэ і кліенты хочуць, каб праца была выкананая "пільна". Таму аб нармаванні працоўнага дня казаць не выпадае.

Вельмі шмат часу ідзе на ўзгадненне замовы і абмеркаванне дэталяў працы. І тут шмат што залежыць ад даверу. Калі кліент давярае мне, усё прасцей. Узнікаюць праблемы і пры абмеркаванні кошту. Ён залежыць, вядома, ад аб'ёму і памеру прадукцыі, ад прапрацоўкі дэталяў і якасці матэрыялу. Але кліенты зазвычай не ўлічваюць складанасць выкананай працы, індывідуальнасць і творчасць.

У прынцыпе заўсёды можна вымеркаваць. Напрыклад, зменшыць колькасць святлодыёдаў. Звычайны чалавек наўрад заўважыць розніцу, але прафесіянал заўсёды ўбачыць. Ну, а калі зэканоміць на матэрыяле, то шыльда праслужыць меншы тэрмін.

Важна ўдасканальвацца

Калі я пачынаў займацца бізнэсам, кампаній для вырабу рэкламы было блізу сямі, цяпер іх значна больш. Вядома, што ніякі тып дзейнасці не абыходзіцца без канкурэнцыі, але варта ўлічваць, што кожны вытворца мае падыход.

Я ўпэўнены, што зарука поспеху ляжыць у безупынным удасканаленні. Я не баюся брацца за складаную працу, безупынна павялічваю спэктар паслуг. А таксама маю задуму аб павелічэнні бізнэсу і ажыццяўленні сваіх новых рэкламных ідэй.