Відэафакт: У Расеі праз адмову парашутаў разбіліся дзве БМД
- 23.09.2019, 10:24
- 25,393
БМД разбіліся на вучэннях «Цэнтр-2019».
Дзве баявыя машыны дэсанту разбіліся на вучэннях «Цэнтр-2019» падчас дэсантавання з самалётаў Іл-76, праз адмову парашутных сістэмаў. Экіпажаў унутры машынаў не было, паведамляе ТАСС, спасылаючыся на прэс-службу Мінабароны РФ. Відэа таго, што адбылося, з'явілася ў тэлеграм-канале «Аператыўная лінія».
«20 верасня 2019 года падчас масавага дэсантавання ваеннай тэхнікі ПДВ на пляцоўкі прызямлення ў Арэнбургскай вобласці не спрацавалі парашутныя сістэмы ў дзвюх баявых машынаў. У выніку няспраўнасці парашутных сістэмаў пры сутыкненні з зямлёй абедзве машыны атрымалі пашкоджанні», – сказалі ў міністэрстве.
Там дадалі, што «дэсантаванне тэхнікі ажыццяўлялася толькі без экіпажаў, пацярпелых няма».
У міністэрстве адзначылі, што прычыны і абставіны здарэння ў цяперашні час вызначае камісія камандавання ПДВ супольна з прадстаўнікамі прамысловасці.