У Менску ўсталявалі «разумны прыпынак», за якім назіраюць больш за 10 камер

У прыпынак уклалі больш за 100 тысяч даляраў.

Каля станцыі метро «Няміга» з боку Верхняга горада адкрылі першы ў Менску разумны прыпынак. Як ён выглядае, што прапануе і дзе такія з'явяцца яшчэ - у матэрыяле tut.by.

Першы інтэрактыўны прыпынак у Менску цяпер працуе замест звычайнага ранейшага на Нямізе. Ён займае 40 «квадратаў» і падзелены на два крылы. У кожным ёсць чатыры USB-парты для падсілкавання гаджэтаў, кнопка экстранага выкліку МНС або міліцыі, экран для выкліку таксі, банкамат і інфашапік, а таксама сэнсарнае табло з раскладам руху транспарту, дзе можна таксама задаць маршрут і выбраць, на чым даехаць.

На прыпынку працуе Wi-Fi, устаноўленыя вендынгавыя аўтаматы з дробнымі таварамі.

Для людзей на інвалідным вазку ёсць адмысловая кнопка для абвесткі кіроўцаў грамадскага транспарту. Выклік - і на прыпынку зверху загараецца зялёны знак вазочніка. Кіроўца бачыць яго, выходзіць на прыпынак і дапамагае чалавеку заехаць у аўтобус.

Крыху пазней тут плануюць усталяваць падзарадку для электрасамакатаў і сегвееў.

Канструкцыя зроблена з металу з элементамі трыплекс-шкла. На прыпынку ўстаноўлена больш за 10 камер відэаназірання, стваральнікі праекта разлічваюць, што гэта выратуе канструкцыю ад вандалаў і зафіксуе ўсе ілжывыя выклікі.

Дыстанцыйна сочыць за захаванасцю прыпынку служба аховы. Разумны прыпынак стаў часткай праекта «Код горада», які рэалізуе кампанія «ГІГ Інвест». У кампаніі разлічваюць і на падтрымку горада ў пытанні захаванасці прыпынку.

- Я веру ў нашых грамадзян. З добрымі рэчамі прыемна добра абыходзіцца, думаю, што праект будуць любіць і берагчы. Гэта вельмі дарагі аб'ект, - кажа кіраўнік праекта «Код горада» з кампаніі «ГІГ Інвест» Андрэй Сушчэня.

У прыпынак уклалі больш за 100 тысяч даляраў - гэта ўласныя інвестыцыі кампаніі «ГІГ Інвест». Партнёрам стаў Белаграпрамбанк, ён размяшчае на прыпынку сваё абсталяванне.

Кампанія плануе за тры гады ўсталяваць сотню такіх прыпынкаў па ўсім Менску. Праўда, інвестыцыйная дамова з горадам не падпісаная. Пакуль ёсць дамоўленасць аб супрацоўніцтве з Завадскім раёнам. «ГІГ Інвест» будзе ўдзельнічаць у аўкцыёнах за права арэнды шасці пляцовак у Заводскім раёне пад такія ж разумныя прыпынкі.

- Праект складзены не стварэннем, а велізарнай колькасцю дазволаў, якія трэба атрымаць. Паводле закона мы павінны атрымліваць усе ўчасткі на аўкцыёне.

Са слоў Андрэя Сушчэні, асноўны даход ад прыпынку прыйдзе з рэкламы - месца цэніцца праз вялікі наплыў пасажыраў. Але акупнасць праекта можа быць няхуткай.

Першы «разумны прыпынак» усталявалі ў Гомелі ў 2016 годзе ў якасці пілотнага праекта. Там прыпынак меншы, у ёй няма некаторых функцый, але летам яе працаздольнасць забяспечваюць сонечныя панэлі, якіх у Менску няма. У сталіцу дапрацаваны праект прыйшоў у 2018 годзе - тады адбыўся аўкцыён на права заключэння дамовы арэнды для ўстаноўкі першага такога прыпынку на Нямізе. Яго выйграла кампанія «ГІГ Інвест», лот сышоў за 24 тысячы рублёў, з пачатковай лічбы цана ўзляцела амаль у 150 разоў. Кампанія арандуе пляцоўку за 515 рублёў у месяц.