Навукоўцы стварылі «самы чорны» матэрыял на сённяшні дзень

Матэрыял здольны паглынуць да 99,995 адсоткаў выпраменьвання, што падае на яго.

Навукоўцы выкарыстоўвалі вугляродныя нанатрубкі, каб стварыць матэрыял, які ў дзесяць разоў цямнейшы за ўсё, што вядома людзям на сённяшні дзень.

Папярэдні рэкорд належаў матэрыялу пад назвай vantablack. Ён складаецца з вертыкальна выраўненых вугляродных нанатрубак і здольны паглынаць да 99,965 адсоткаў святла. Высветлілася, што гэты неверагодны паказчык можна павялічыць, выкарыстоўваючы нават тыя самыя масівы нанатрубак. Пра гэта піша unian.net са спасылкай на Naked Science.

Напраўду аўтары новага матэрыялу, які пабіў папярэдні рэкорд у паглынанні святла, не збіраліся яго ствараць. Яны толькі хацелі палепшыць цеплавыя і электрычныя ўласцівасці алюмінію, гадуючы на ім вугляродныя нанатрубкі. У сваёй працы навукоўцы знайшлі спосаб, каб выдаліць з паверхні пласт алюмінію, яго аксіду, які перашкаджае праходжанню электрычнага току. Гэта ўдалося зрабіць з дапамогай соляў, якія змяшчаюць іоны хлору.

На другім этапе даследавання навукоўцы змаглі вырасціць на вычышчанай алюмініевай паверхні нанатрубкі, абложваючы на ёй пары вугляроду. Урэшце даследчыкі атрымалі чорны матэрыял, які, як і чакалася, меў найлепшыя цеплавыя і электрычныя ўласцівасці. Але выявілася і тое, што ніхто з аўтараў працы не прадказваў - матэрыял апынуўся «вельмі чорным».

Дзеля цікавасці даследчыкі наважылі вымераць яго каэфіцыент паглынання святла. Высветлілася, што новы матэрыял здольны паглынуць да 99,995 адсоткаў выпраменьвання, што падае на яго. Прычым гэта значэнне не змянялася пры любым куце падзення.

Навукоўцы не зусім упэўненыя ў механізме рэкорднай непразрыстасці матэрыялу. Але яны падазраюць, што гэта можа мець нейкае дачыненне да камбінацыі вытраўленага алюмінію, які ўжо мае чорны колер з вугляроднымі нанатрубкамі. Навукоўцы мяркуюць, што масівы вугляродных нанатрубак могуць улоўліваць і ператвараць вялікую частку святла, што паступае ў цяпло, адлюстроўваючы назад вельмі малую яго колькасць у выглядзе святла.

Растлумачыць эфект можна тым, што фатоны, трапляючы ў прастору паміж нанатрубкамі, захрасаюць там і страчваюць энэргію ад сутыкнення з нанааб’ектамі. Рана ці позна фатоны страчваюць усю энэргію і, трапляючы ў электронныя арбіталі вугляроду, цалкам знікаюць.