Украіна знізіла пастаўкі расейскага дызеля ўдвая
1- 25.08.2019, 17:17
- 9,780
Украіна вызначыла набываць больш дызеля ў Беларусі і краінах ЕЗ.
Аб'ёмы паставак дызеля з Расеі ва Украіну ў жніўні знізіліся ўдвая, паведаміў прадстаўнік прэзідэнта краіны Уладзіміра Зяленскага ў Кабінеце Андрэй Герус у Facebook.
Са слоў Геруса, доля расейскага дызельнага паліва на рынку складзе блізу 20 адсоткаў. Ён адзначыў, што павялічыліся пастаўкі з Беларусі, краін Еўразвязу і з марскіх кірункаў. Герус дадаў, што дэфіцыту няма, а кошты дызпаліва знізіліся.
6 жніўня Герус распавёў, што Украіна змагла забяспечыць альтэрнатыўныя пастаўкі дызельнага паліва і замясціла імпарт з Расеі. З ягоных слоў, нафтатрэйдары зрабілі дадатковыя запасы расейскага паліва на нафтабазах і збіраюцца яго рэалізоўваць. Гаворка ішла пра больш чым 40 тысячах тон. Герус адзначыў, што дадаткова растуць пастаўкі з Літвы і краін ЕЗ, паліва таксама збіраліся атрымліваць праз Беларусь.
З 1 жніўня ва Украіне ўвайшлі ў дзеянне спецыяльныя падаткі на імпарт звадкаванага газу і дызельнага паліва з Расеі. Першапачаткова збор за дызпаліва будзе спаганяцца ў суме 3,75 адсотка, а з 1 кастрычніка - 4 адсоткі, на звадкаваны газ - 1,75 і 3 адсоткі адпаведна.