У Ганконгу пратэстоўцы паставілі барыкады з бамбуку

У горадзе ідзе дванаццаты тыдзень пратэстаў.

Дванаццаты тыдзень пратэстаў у Ганконгу, які праходзіў даволі мірна, у суботу перарос у новыя сутыкненні паліцыі з дэманстрантамі, якія прайшлі маршам па густанаселеным раёне Куньтхон, паведамляе расейская служба ВВС.

Сілавікі заступілі шлях пратэстоўцам. Тыя пачалі ставіць барыкады з бамбукавых будаўнічых рыштаванняў і вулічных жалезных перагародак. Каля будынку аддзялення паліцыі супрацьстаянне працягвалася некалькі гадзін, пакуль дэманстранты не пачалі закідваць паліцэйскіх камянямі, цаглінамі і бутэлькамі з вадой. Паліцыя выкарыстала слёзацечны газ, гумовыя кулі і стала затрымліваць удзельнікаў пратэсту, збіваючы іх дубінкамі.

Да патрабаванняў захавання палітычных і грамадзянскіх свабод, якія сталі галоўнай тэмай пратэсту, дадаліся некалькі канкрэтных патрабаванняў: дэманстранты ў Куньтхоне пратэставалі супраць закрыцця чатырох станцый метро (і іншых спроб адміністрацыі гарадскога транспарту замінаць дэманстрантам) і патрабавалі прыбраць з вуліц слупы з электроннай апаратурай, якая, як заяўлялі ўлады Ганконга, патрэбная для вымярэнняў чысціні паветра.

Апазіцыя падазрае, што напраўду гэта камеры сістэмы сачэння, якая выкарыстоўваецца кітайскай дзяржбяспекай для ідэнтыфікацыі ўдзельнікаў пратэсту.

Увесь тыдзень трывалі пратэсты, але мірна - у мінулую нядзелю паліцыя не перашкаджала шэсцю больш за паўтара мільёна чалавек, і гэтая акцыя, са слоў удзельнікаў, прыкметна падняла маральны дух пратэстоўцаў.

У пятніцу дзясяткі тысяч прыхільнікаў дэмакратычнага Ганконга, узяўшыся за рукі, утварылі адзіны ланцуг, які працягнуўся праз некалькі раёнаў, па набярэжных і па схілах Львінае горы - адной з галоўных славутасцяў горада - аж да самай вяршыні.

З надыходам цемры ўдзельнікі акцыі запалілі ліхтарыкі на мабільных тэлефонах.

Жывы ланцуг

Кампанія YouTube абвясціла ў пятніцу, што закрыла больш за 200 відэаканалаў, якія выкарыстоўваліся дзяржаўнай прапагандай мацерыковага Кітая для распаўсюджвання дэзінфармацыі пра пратэсты ў Ганконгу.

За некалькі дзён да гэтага з "Твітару" былі выдаленыя 936 старонак троляў - як заявіла сацсетка, яны распальвалі палітычныя нязгоду ў Ганконгу.

На ціск з боку Пекіна скардзяцца супрацоўнікі сістэмаўтваральных ганконжскіх кампаній, такіх як аператар ганконжскага метро і авіякампанія Cathay Pacific.

Сцюардэса і кіраўнік прафзвязу авіяліній Рэбека Сі, звольненая 21 жніўня, назвала сакрэтны ціск кітайскіх уладаў на мэнэджэраў у Ганконгу "белым тэрорам". 16 жніўня сышоў у адстаўку кіраўнік Cathay Pacific. З кампаніі звольненыя ўжо як мінімум чацвёра супрацоўнікаў, якія выяўлялі ў сацсетках падтрымку пратэстам - у іх ліку двое пілотаў.