Нафта рэзка таннее праз чарговую пастанову Кітая і ЗША ўвесці ўзаемныя мыты

Закранула гэта і расейскі рубель.

Цэны нафты і курс рубля імкліва пакаціліся ўніз у пятніцу на фоне нечаканай эскалацыі гандлёвай вайны Кітая і ЗША, піша finanz.ru.

Ф'ючэрсы нафты Brent, якім раніцай атрымлівалася трымацца вышэй за 60 даляраў за барэль, упалі амаль на 1,5 даляра (2,5%) за 15 хвілін, а даляр на МасБіржы зноў падняўся вышэй за 66 рублёў, пасля таго, як міністэрства гандлю КНР анансавала новы раўнд мытаў на амерыканскія тавары аб'ёмам 75 млрд даляраў у год.

У адказ на амерыканскія тарыфы, увядзенне якіх было запланаванае на восень, але адкладзенае да сярэдзіны снежня, Пекін з 1 верасня ўводзіць мыту ў 5% на амерыканскія соевыя бабы. З 15 снежня будзе адноўленая 25-працэнтная мыта на аўтамабілі з ЗША.

Хоць абвешчаныя Кітаем меры больш сціплыя па маштабе, чым амерыканскія (яны датычацца тавараў на 300 млрд даляраў), яны заспелі рынкі знянацку, кажа эканаміст ING Ірыс Панг.

Да 20.06 мск нафта Brent патаннела на 2,34%, да 58,52 даляра за барэль, WTI - абрынулася на 3,6%, да 53,34 даляра за бочку, новага 2-тыднёвага мінімуму.

Курс даляра з разлікам заўтра на МасБіржы вырас на 67 капеек, да 66,0750 рубля, дацягваючыся ў моманце адзнакі да 66,2. Еўра падскочыў на 97 капеек, да 73,6125 рубля. Рынак акцый ЗША абваліўся на 2,2% паводле індэкса S&P500 і на 2,6% у індэксе Nasdaq.

Сюрпрыз, верагодна, Кітай паднёс і Беламу дому, які аказаўся ў сітуацыі, калі трэба рэагаваць, а падрыхтаваных захадаў, відавочна, няма, кажа Панг.

Першай рэакцыяй Дональда Трампа стаў звыклы паток ранішніх твітаў, у якіх прэзідэнт ЗША абвінаваціў Кітай у крадзяжы інтэлектуальнай уласнасці на сотні мільярдаў даляраў і негатовасці спыніць наркатрафік у выглядзе паставак у ЗША фентанілу - моцны опіумны анальгетык, які выкарыстоўваецца як наркотык, забіваючы, са слоў Трампа, «сотні тысяч амерыканцаў у год».

«Нашым цудоўным амерыканскім кампаніям ужо цяпер загадана пачынаць шукаць альтэрнатыву Кітаю, у тым ліку вяртаючы бізнэс дадому і вырабляючы тавары на тэрыторыі ЗША. Я адкажу на мыты Кітая сёння ж. Гэта цудоўная магчымасць для Злучаных штатаў», - напісаў Трамп.

Далейшымі крокамі Кітая, напэўна, стане стварэнне «чорнага спісу» амерыканскіх кампаній, з якімі непажадана весці бізнэс, а таксама далейшая дэвальвацыя юаня - да адзнакі 7,1 за даляр, кажа Панг.

Слабы юань стане новым ударам па сыравінных рынках і сусветным гандлі, які ўжо перажывае горшы год з 2008-га. Аб'ёмы глабальнага тавараабароту скарачаюцца год да года ўпершыню за 10 гадоў, а ў ліпені агульны аб'ём тавараабмену быў мінімальным за два гады.

Глабальны індэкс PMI ўжо тры месяцы знаходзіцца ніжэй за 50 пунктаў - у зоне, якая сведчыць пра спад прамысловай вытворчасці. Гэта азначае нізкі попыт нафты і іншыя сыравінныя тавары, на якія прыпадае 80% экспартных даходаў расейскай эканомікі.

Плён гандлёвай вайны ўжо пажынаюць «Газпрам», які перажыў у жніўні рэкордны за шмат гадоў правал экспарту (на 22%), «Русал», які страціў палову прыбытку да падаткаў за паўгода, а таксама «Алроса», якая недалічылася 25% даходу праз падзенне попыту ў Азіі.

Калі ўслед за прамысловасцю пакоціцца ўніз попыт на ўзроўні радавых спажыўцоў, паўстане эфект «снежнага камяка» з рэальнай пагрозай рэцэсіі, кажа аналітык ІЧ «Фрыдам Фінанс» Ален Сабітаў.

Адзіная добрая навіна - у тым, што цяпер у ФРС практычна не застаецца выбару, акрамя як знізіць стаўку на пасяджэнні 18 верасня, адзначае ён.

«Але, па-першае, узровень ставак ужо цяпер гістарычна нізкі, а па-другое, нізкія стаўкі, як паказвае досвед Еўропы, не заўсёды здольныя актывізаваць эканамічнае развіццё і для паляпшэння перспектыў для сусветнай эканомікі манетарных стымулаў будзе недастаткова», - папярэджвае Сабітаў: патрэбны гандлёвы кампраміс, але пакуль сітуацыя рухаецца ў супрацьлеглым кірунку.