Як выглядае элітнае паселішча, куды не хацелі пускаць Меліціну Станюту

Бацьку знакамітай гімнасткі пасёлак нагадаў карціну Драздовіча "Абсерваторыя на кальцы Сатурна".

Беларускую гімнастку Меліціну Станюту не пусцілі пашпацыраваць па вуліцы ў Менску, названай у гонар ейнай прабабулі Стэфаніі Станюты. Там размешчаны элітны пасёлак, пабудаваны Dana Holdings. Забудоўшчык патлумачыў, у чым справа, і правёў нашчадкаў знакамітай акторкі па вуліцы. А журналісты tut.by даведаліся, каму там належаць пляцы і ці законна іх агароджваць парканам з аховай.

Пасёлак на вуліцы Стэфаніі Станюты з 14 дамоў размешчаны каля Цнянскага вадасховішча, вакол прыватная забудова і лес. Надзел агароджаны па перыметры, на ўездзе-шлагбаум і КПП. На мінулым тыдні Меліціну Станюту на вуліцу не прапусцілі, параіўшы звярнуцца да забудоўшчыка Dana Holdings. У кантакт-цэнтры кампаніі гімнастка не атрымала адказу.

— Як праўнучцы і ўнучцы прайсціся па вуліцы прабабулі? —пыталася спартоўка ў сацсетках.

На пытанне tut.by, чаму тут агароджа і КПП, старшыня рады дырэктараў Dana Holdings Вібор Муліч адказвае: гэта пастанова людзей, якія тут жывуць.

- Гэта закрытая тэрыторыя, вуліца нікуды не выходзіць. Так жыхары дамовіліся паміж сабой для бяспекі. Для іншых грамадзян гэтая вуліца не нясе функцыі. Але не для праўнучкі Станюты. Калі яе сюды не пусцілі - гэта было звязана з непрафесіяналізмам ахоўніка, ён няправільна сябе павёў. Для нас гэта не менш непрыемны выпадак.

У Dana Holdings нам распавялі, што пытанне развязалі. Агульны знаёмы звязаўся з забудоўнікам і спартоўкай, пасля чаго спадарыню запрасілі пашпацыраваць па вуліцы яе прабабулі.

Меліціна Станюта прыехала на сустрэчу з бацькам - Дзмітрыем Станютам. Старшыня рады дырэктараў Dana Holdings Вібор Муліч правёў іх праз пункт пропуску.

Дзмітрый Станюта: “Нашая сям'я чакала, калі з'явіцца вуліца Станюты”

На ўездзе нас сустракае супрацоўнік у форме, Муліч кажа, што гэта ахоўнік. На КПП стаіць камера відэаназірання. Вуліца Станюты праходзіць амаль паралельна вуліцы Кальцова, якая таксама абгароджаная высокім парканам і туямі - за імі толькі бачныя дахі дамоў.

Мы выходзім на вуліцу Станюты, дзе па траве ездзіць робат-газонакасілка. Цяпер вуліца тупіковая, але, магчыма, яе працягнуць.

“Палацы тут ого-го”, - публікуе ў Instagram Меліціна.

Дзмітрый Станюта распавёў, што ў 2014 годзе іх сям'я даведалася, што адну з вуліц Менска назавуць імем ягонай бабулі.

- Мы былі вельмі рады, што ў ліку імёнаў, якія атрымалі новыя вуліцы, будзе вуліца Станюты. Нашая сям'я чакала, калі яна з'явіцца. Але некалькі гадоў здавалася, быццам такой вуліцы няма. Мы не ведалі, дзе яна. Улетку я выязджаў на Цнянку і раптам, праязджаючы тут, убачыў гэты паркан з шыльдай. Бывае так: ты ходзіш міма нейкага месца і не заўважаеш, якое яно. Так было і ў гэтым выпадку.

Дзмітрый Станюта быў непрыемна здзіўлены, што вуліца імя ягонай бабулі закрытая.

- Не ведаю, хто тут жыве. Выглядае добра, новыя багатыя палацы. Нагадвае карціну Драздовіча "Абсерваторыя на кальцы Сатурна", відаць, што нетутэйшы краявід. Але давайце паглядзім на гэта пазітыўна.

Дзмітрый кажа: для яго вуліц у гонар бабулі ў Менску шмат. Гэта дом на праспекце Незалежнасці, 19, з мемарыяльнай шыльдай Стэфаніі Станюты - там дагэтуль жыве ейны зводны брат, вуліца Берасцянская, дзе калісьці жыла Станюта, і вуліца Карастаянавай, дзе акторцы выдалі кватэру.

Пасля шпацыру Муліч паабяцаў сям'і Станюты: паводле папярэдняга ўзгаднення яны могуць сюды прыходзіць.

Каму належаць надзелы на гэтай вуліцы?

У элітным пасёлку на вуліцы Стэфаніі Станюты зарэгістравана 14 дамоў. Гэтыя палацы ў 2015 годзе пабудавала Dana Holdings.

Згодна з выпіскамі з адзінага дзяржаўнага рэгістра нерухомасці, права ўласнасці на ўсе капітальныя будынкі на Станюты належыць замежнай кампаніі "Дана Астра", зямельныя надзелы выдадзеныя ў арэнду на 98-99 гадоў.

Пляцы для дамоў тут памерам ад 0,1353 да 0,1500 га. Гадавая арэндная плата вагаецца ад 450 да 770 рублёў.

Увесь надзел з забудовай на Станюты займае крыху больш за 3,7 га. Гадавая арэндная плата за яго складае 209 тысяч рублёў.

Катэгорыя гэтага вялікага пляца — “землі населеных пунктаў, садовых таварыстваў, і кааператываў”. Ён выкарыстоўваецца для эксплуатацыі і абслугоўвання будынкаў на Станюты, 12, спартыўных аб'ектаў і пад'язных шляхоў да жылога масіву ў раёне аднайменнай вуліцы.

Журналісты знайшлі аб'яву за мінулы год аб здачы ў арэнду дома на вуліцы Станюты за 12 тысяч рублёў (сума эквівалентная 6,4 тысячы даляраў). З апісання: "Дом знаходзіцца ў прыродаахоўнай зоне вадасховішча Цна ў пасёлку клубнага тыпу, жыхары дамоў могуць выкарыстоўваць басейн, прыгожую рэстарацыю з кухняй, корты. Від на водную сістэму, да дома прылягае сасновы лес. Дом 2015 года пабудовы. Выкананы якасны свежы рамонт. Ёсць сучасная мэбля. У сутарэнні пакой для адпачынку “саўна".

Будынак №12, пра які мы пісалі вышэй, стаіць адасоблена на карце, можам выказаць здагадку, што гэта і ёсць рэстарацыя. Побач размешчаны тэнісны корт і дзіцячая пляцоўка.

Можаце паглядзець, як выглядала забудова на вуліцы Станюты і катэджная забудова на вуліцы Кальцова (гэта па суседстве, праз паркан) у студзені 2018 года.

У катэджным пасёлку на Кальцова мы знайшлі дамы, якія зарэгістраваныя на бізнэсоўцаў і іх сваякоў. Сярод іх - жонка кіраўніка “А-100" Марыя Цэнтар, уласніца Glassbel Ларыса Сабалеўская, заснавальнік ТАА “Тэхбудрэсурс”, старшыня “Беларускай федэрацыі коннага спорту" Сяргей Дражын ды іншыя.

Побач Клуб тэніса - унітарнае прадпрыемства Прэзідэнцкага спартыўнага клуба.

Са слоў Вібора Муліча, іншых надзелаў закрытага тыпу, як на вуліцы Станюты, у Dana Holdings няма.

Юрысты: “Калі атрыманыя ўзгадненні — устаноўка агароджы законная”

Правамернасць устаноўкі агароджы пракаментавалі юрысты REVERA Аляксандр Штрыкуль і Аляксандр Антонаў. З іх слоў, устаноўка агародж на зямельным надзеле -гэта разнавіднасць работ добраўпарадкавання.

— Добраўпарадкаванне зямельных надзелаў з'яўляецца не правам, а абавязкам землекарыстальнікаў. Пры гэтым, правядзенне практычна ўсялякага добраўпарадкавання патрабуе ўзгаднення — - адзначае Аляксандр Антонаў.

- Напрыклад, архітэктурнае ўзгадненне агароджы прысядзібнага надзела павінна быць папярэдне ўзгоднена з тэрытарыяльнымі органамі архітэктуры і горадабудаўніцтва. Землекарыстальнік павінен на ўзгадненне даць эскіз агароджы ў адвольнай форме з асноўнымі тэхнічнымі параметрамі - канструкцыя, вышыня, матэрыял, колер. Ёсць і патрабаванні да агародж - па вышыні, ступені празрыстасці — дадае Штрыкуль.

Спецыялісты REVERA рэзюмуюць: калі землекарыстальнік атрымаў патрэбныя ўзгадненні пры ўсталяванні агароджы - ягоныя дзеянні законныя. Не бачаць юрысты парушэнняў і ў выкарыстанні "іншых сродкаў кантролю і абмежавання доступу" (напрыклад, відэакамер), калі яны не былі ўсталяваныя самавольна.

Юрысты звяртаюць увагу, што прылеглая да пабудоў зямля ў Беларусі можа быць аформленая па-рознаму. Яна можа належаць не толькі да зямлі агульнага карыстання і быць у вольным доступе, але можа быць і прадстаўленай у карыстанне уласнікам будынкаў.

Першы выпадак сустракаецца часцей, у тым ліку і таму, што уласнікам нерухомасці не трэба плаціць за карыстанне прылеглай зямлёй. У другім выпадку, акрамя правоў на "эксклюзіўнае" карыстанне зямлёй (напрыклад, права ўсталяваць шлагбаум і агароджу), ёсць і абавязкі аб выплаце зямельнага падатку (арэнднай платы). Выніковая пастанова, як будзе аформленая прылеглая тэрыторыя — за органам, які выдае зямельны надзел. У Менску гэта Менгарвыканкам. Па магчымасці ўлічваецца і меркаванне уласнікаў.

Прыклад, калі прылеглая нават да шматкватэрных дамоў зямля абнесеная парканам, - жылы комплекс "Прэстыжына" ў Менску.