Аўтаўладальнік: ДАІ хоча парадку на дарогах, а не можа арганізаваць нават сваю працу

Беларускі кіроўца сутыкнуўся з сітуацыяй, больш падобнай на квэст.

Бясконцыя чэргі, блытаніна, збоі ў працы кампутараў і страчаны дзень. Аўтаўладальнік Дзмітрый Ганчароў прыйшоў ставіць на ўлік у ДАІ свой новы аўтамабіль, а сутыкнуўся з сітуацыяй, больш падобнай на квэст.

Новы аўтамабіль Дзмітрый набыў тыдзень таму і тут жа заклапаціўся аб пастаноўцы яго на ўлік. Прайшоўшы зверку нумароў, ён тут жа адправіўся афармляць дакументы.

- Сябры параілі прыходзіць у чацвер, сказалі, што ў гэты дзень менш за ўсё людзей, - распавядае суразмоўца «Салідарнасці». - Але калі я ўвайшоў у будынак ДАІ на Лебядзіным, то ўбачыў нейкі сусветны гармідар. Чалавек трыста, калі не больш, стаялі ў розных чэргах. І гэта пры тым, што ўсе аперацыі ажыццяўляліся паводле электроннай чаргі. Гучыць смешна, але нават да тэрмінала, які выдае нумар чаргі, стаяла чарга.

Пазней Дзмітрыю патлумачылі, што ў гэты дзень было сапраўды нешматлюдна.

Няпроста выявілася разабрацца і з самой сістэмай.

- Аўтамабілі я мяняю нячаста, да гэтага купляў сем гадоў таму. Тады ўсё было інакш. Але тым не менш, нават маючы дзьве вышэйшыя адукацыі, я з цяжкасцю разабраўся, што трэба рабіць. А там былі і людзі сталага веку, якія прыйшлі зняць з уліку свой старэнькі «Жыгуль». Добра, дапамаглі хлопцы, якія рэгулярна займаюцца купляй-продажам аўто.

Адстаяўшы жывую чаргу да тэрмінала электроннай чаргі, і ўзяўшы талончыкі адразу ў два вакны - адзін у касу для аплаты паслуг, другі - для прыёму дакументаў, Дзмітрый пачаў чакаць.

- У касу перада мной стаяла 80 чалавек, у другое акно - 185! Давялося змірыцца. Патэлефанаваў на працу, сказаў, што да абеду мяне не будзе. Але я недаацаніў нашу ДАІ. А 13 гадзіне яны ўсе дружна закрыліся і...сышлі на абед. Гэта значыць, разумееце, пабудаваць сваю працу так, каб усе пяць чалавек не елі адначасова, там не могуць!

Да таго моманту ў чарзе для падачы дакументаў перад Дзмітрыем заставалася блізу 70 чалавек. Каб не стаяць без справы, мужчына наважыў таксама схадзіць перакусіць.

- Прыкінуў, што ў мяне ёсць як мінімум дзве гадзіны вольнага часу. Аднак праз гадзіну ўсё ж наважыў вярнуцца: ці мала што? Раптам пасля абеду ДАІ пачне працаваць з падвоенай сілай? - узгадвае суразмоўца.

Якое ж было яго здзіўленне, калі, вярнуўшыся, выявіў, што электроннай чаргі ўжо больш няма і цяпер усіх прымаюць па жывой.

- Сказалі, што зламаліся кампутары, і цяпер трэба станавіцца ў чаргу зноўку! - абураецца суразмоўца. - Датуль да кожнага акна ўжо стаялі даўжэзныя чэргі людзей. Хлопцы, якія займаюцца продажам аўто, распавялі, што такое адбываецца рэгулярна: маўляў, электронную чаргу выключаюць, бо жывая ідзе хутчэй. Больш за ўсё крыўдна было тым, перад кім да абеду заставалася даслоўна некалькі чалавек, а цяпер ім зноў даводзілася станавіцца ў чаргу нанова.

Натуральна, ні на якую працу Дзмітрый у гэты дзень не трапіў:

- Выдаткаваў цэлы дзень на тое, каб проста аддаць дакументы. IT-краіна! А на наступны трэба было зноў ехаць у ДАІ ўжо да прызначанага часу, каб атрымліваць транзітныя нумары на стары аўтамабіль, а яшчэ праз дзень - па новыя нумары на новае аўто. І зноў у чаргу!

І нікога там не хвалюе, ці заняты ты, ці працуеш - гэта ўсё твае праблемы. Мне часта па абавязку службы даводзіцца мець справу з дзяржарганізацыямі, але з такім сутыкаюся ўпершыню. ДАІ хоча парадку на дарогах, а не можа арганізаваць нават уласную працу!