Белы дом распрацоўвае меры для паскарэння росту эканомікі ЗША
- 20.08.2019, 10:02
- 6,150
ЗША могуць пайсці на зніжэнне падаткаў і скасаванне шэрагу мыт.
Белы дом пачаў распрацоўваць меры для паскарэння росту эканомікі ЗША, каб не дапусціць рэцэсіі, пішуць газеты The New York Times (NYT) і The Washington Post (WP) са спасылкай на крыніцы, паведамляе РБК.
Са звестак NYT, сярод абмеркаваных варыянтаў - зніжэнне падатку на заробак, а таксама скасаванне некаторых уведзеных прэзідэнтам ЗША Дональдам Трампам мыт. У адміністрацыі прэзідэнта ўжо падрыхтавалі прапановы аб зніжэнні падаткаў, што дазволіць «разагнаць» эканоміку, павялічыўшы заробкі.
Як адзначае выданне, у часы прэзідэнцтва Барака Абамы, такія захады выкарыстоўвалі ў перыяд з 2011 да 2012 года, каб стымуляваць рост эканомікі пасля рэцэсіі ў 2009 годзе. Гаворка ідзе аб падатку 6,2% ад заробку. Гэтая сума выкарыстоўваецца для фінансавання праграм сацыяльнага забеспячэння. У мінулы раз стаўку на ім знізілі да 4,2%.
Пры гэтым у афіцыйнай заяве Белага дома гаварылася, што зніжэнне падаткаў для грамадзян абмяркоўваецца, але падатак на заробак пакуль не разглядаецца, паведамляе WP.
Як піша NYT, сам Трамп яшчэ не ў курсе ідэі ягонай адміністрацыі і невядома, ці пагодзіцца ён на гэты план, які ў выпадку ўхвалення кіраўніком дзяржавы павінны будуць зацвердзіць у кангрэсе.
У мінулым прадстаўнікі Дэмакратычнай партыі ЗША выступалі за зніжэнне стаўкі гэтага падатку, тады як рэспубліканцы паказвалі, што такія захады не дапамагаюць эканоміцы і пагражаюць дэфіцытам, адзначае WP.
На мінулым тыдні на рынку дзяржаўнай запазычанасці ЗША спрацаваў адзін з галоўных індыкатараў рэцэсіі: кошт двухгадовых аблігацый скарбніцы ненадоўга перавысіў даходнасць дзесяцігадовых. Гэта адбылося ўпершыню з 2007 года, пасля інверсія спынілася, але стаўкі за кароткія і доўгія паперы захаваліся практычна на адным узроўні.
На фоне гэтых навін 14 жніўня фондавыя рынкі ЗША закрыліся падзеннем: індэкc Dow Jones Industrial Average упаў на 3,05%, S & P 500 - на 2,39%, а NASDAQ - на 3,02%. У выніку дзесяць найбагацейшых бізнэсоўцаў свету паводле версіі Forbes страцілі $18 млрд.
Аналітыкі Goldman Sachs папярэджвалі, што ўплыў гандлёвай вайны ЗША і КНР на амерыканскую эканоміку ўзмацняецца. На іх думку, бакі наўрад ці ўкладуць гандлёвае пагадненне да прэзідэнцкіх выбараў у 2020 годзе.
Сам Трамп заяўляў, што эканоміка ЗША «вельмі моцная», нягледзячы на пастановы ФРС (за гады кіравання Трампа стаўкі ФРС неаднаразова ўздымалі. - РБК). На ягоную думку, дэмакраты хочуць, каб яна была дрэннай дзеля мэт, звязаных з выбарамі прэзідэнта ў 2020 годзе. «Вельмі эгаістычна! Наш даляр такі моцны, што, на жаль, раніць іншыя часткі свету», - напісаў ён у Twitter, дадаўшы, што стаўку ФРС варта знізіць на 100 базісных пунктаў. «Калі б гэта адбылося, наша эканоміка была б яшчэ лепшай, а сусветная эканоміка была значна і хутка палепшылася б», - сказаў на заканчэнне Трамп.