«Два хлопцы селі ў багажнік - і мы паехалі»
15- 8.07.2019, 14:33
- 53,022
Ацалелы ў рэзананснай аварыі пад Белаазёрскам распавёў падрабязнасці.
Жудасная аварыя адбылася пад Белаазёрскам 7 ліпеня: «Мерседеc GL» перавярнуўся ў адзін з каналаў. Загінулі на месцы пяцёра - трое дзяцей і двое дарослых (мужчына і жанчына).
Пры гэтым, у аўтамабілі знаходзілася 10 чалавек (пяцёра мужчын, дзве жанчыны і трое малалетніх дзяцей).
Як здолела даведацца nn.by, за стырном быў 31-гадовы жыхар Белаазёрска Андрэй Букраба. У ягонай крыві выявілі 1,4 праміле алкаголю.
Высветлілася, што «Мерседэс» належыць бацьку хлопца. Прычым самога Андрэя амаль 10 гадоў таму пазбавілі пасведчання за кіраванне ў п'яным выглядзе.
«Сын жыў асобна. Аўто ён браў заўсёды, калі трэба было, бо мне ездзіць асабліва няма куды.
Учора я даведаўся ўсё пасля таго, як здарылася бяда. Прыехаў на месца, паўдня там правёў... Сына тады ўжо забралі ў міліцыю», - распавёў бацька Андрэя.
Вядома, што вялікая кампанія моладзі разам з дзецьмі адпачывала на лецішчы ў знаёмых. Паехалі туды 6 ліпеня.
На наступны дзень, калі вярталіся дадому, і адбылося страшнае ДТЗ.
Журналісты адшукалі аднаго з ацалелых у аварыі - Віталя Станкевіча, ён распавёў падрабязнасці таго дня.
«Там кампанія адпачывала на лецішчы. Потым яны патэлефанавалі Андрэю. Ён прыехаў да іх і патэлефанаваў і мне. Кажа: ці не хочаш пад'ехаць на дачу, адпачнем?
Я пагадзіўся. Букраба прыехаў па мяне разам з Кацярынай. Ён да яе падкочваў, можна сказаць, але ці сустракаліся яны, я не ведаю.
Мы прыехалі на лецішча. Але прайшло хвілін дзесяць, і гаспадар дачы стаў казаць, што ў яго ўзніклі нейкія справы, маўляў, трэба збірацца і ехаць, - успамінае Віталь. - А аўтамабіль у Букрабы ж вялікі. Ну і наважылі, каб два рэйсы не рабіць, загрузіцца ўсім адразу».
Спераду побач з кіроўцам села Ірына. На калені пасадзіла сваю 9-гадовую дачку.
Ззаду сеў сам Віталь, побач - Кацярына і яшчэ адзін госць, Ігар. Разам з Кацярынай былі яе дзеці, хлопчык і дзяўчынка.
Яшчэ двое хлопцаў: Аляксандр і Павел размясціліся ў багажніку.
Паехалі дадому.
«Букраба ехаў з хуткасцю кіламетраў 80-90, гэта дакладна. І на павароце ён ці пачаў тармазіць, ці яшчэ што, я не ведаю. Але машыну занесла і яна не ўпісалася ў паварот», - кажа Віталь.
«Мерседэс» перакуліўся ў канал.
Частцы людзей удалося выратавацца.
«Я не ведаю, астатнія патанулі або загінулі ад траўмаў. Мне здаецца, яны проста не змаглі выбрацца з аўтамабіля. Усё адбылося вельмі хутка. Амаль усе вокны былі зачыненыя. Я мяркую, што дзверы магло заблакаваць. Акно побач з кіроўцам было адчыненае, Андрэй выбраўся неяк. Аляксандр, які сядзеў у багажніку, змог адкрыць яго, частка людзей вылезла. Я сам быў у такім шоку, што нават не памятаю, як выбраўся з той машыны», - распавядае Станкевіч.
Акрамя яго, выжыў кіроўца, Андрэй Букраба, і двое яго знаёмых: Аляксандр і Ігар.
Павел, які сядзеў у багажніку, загінуў.
Кацярына выжыла, але загінулі двое яе дзяцей: 9-гадовы хлопчык і 4-гадовая дзяўчынка.
Ірына, якая сядзела на пасажырскім месцы ля кіроўцы, загінула разам са сваёй 9-гадовай дачкой.
«Калі я выбраўся на бераг, мяне ванітавала: так моцна наглытаўся вады. Аляксандр выбраўся і паклікаў нейкага рыбака. Выклікалі МНС.
Аляксандр і рыбaк пачалі ныраць, але без толку: вялікая глыбіня. Рыбак сказаў, што калі ныраеш да машыны, ужо не застаецца кіслароду, каб нешта там пад вадой зрабіць, трэба ўжо ўсплываць.
Прыехалі з МНС. Яны чамусьці прыехалі без аквалангаў - не ведаю чаму, можа, ім не так паведамілі аб здарэнні.
Яны паспрабавалі ныраць - таксама безвынікова.
Потым змаглі падчапіць машыну за фаркоп - «Мерседэс» быў у вадзе так, што нос унізе, а задняя частка паднятая», - успамінае Віталь.
Прыехала міліцыя, хуткая. Кацярыне, у якой загінулі двое дзяцей, нешта калолі, бо жанчына была ў жудаснай істэрыцы.
Цяпер кіроўца Андрэй Букраба знаходзіцца пад вартай.
«Андрэй нідзе не працаваў. У свой час яны разам з бацькам ездзілі ў Маскву, добра там падзарабіў. Таму ён мог сабе дазволіць пакуль не працаваць.
Але я не скажу, каб Букраба быў нейкім выпівохай. Ну, мог выпіць час ад часу. Але апошнім часам ён не ўжываў, бо былі праблемы са здароўем, - кажа Віталь. – Ці выпіваў Букраба на лецішчы, я не бачыў. Калі ён заязджаў па мяне, я не заўважыў, каб ад яго несла алкаголем, ці выглядаў ён, як п’яны».
У той жа дзень, 7 ліпеня, была распасатая крымінальная справа. Кіроўцу Андрэю Букрабе пагражае да 10 гадоў зняволення.