Што вядома пра дзіўную смерць вяскоўца ў міліцэйскай машыне пад Кобрынам
28- 7.07.2019, 8:17
- 34,478
У ноч на 6 ліпеня ў аграгарадку Стрыгава адбыўся дзіўны суіцыд.
Малады мужчына забіў сябе ў міліцэйскім аўто.
«Наша Ніва» даведалася некаторыя дэталі гэтай гісторыі.
33-гадовы Дзмітрый Захарчэня жыў у аграгарадку Стрыгава на вуліцы Савецкай. Быў жанаты, меў дваіх дзяцей: пяць і сем гадоў. Працаваў на будаўнічай фірме вахтавым метадам. Тыдзень праводзіў дома, на тыдзень ад'язджаў на працу ў Кобрын.
Суседка Ніна Венедыктаўна кажа, што сям'я Захарчэней была праблемная.
«Дзіма ў той сям'і быў самы адэкватны, я нават не разумеў, чаго ён з імі жыве», - кажа іншы сусед.
Міліцыя раней паведамляла, што Дзмітрый прыцягваўся да адказнасці праз сямейныя скандалы.
Са слоў суседзяў, у ноч трагедыі мужчына калі і быў п'яны, то не моцна. Ды яшчэ і нібыта сам выклікаў міліцыю.
«Я была ў іх за паўгадзіны да той бяды. Гэта было каля паловы другой гадзіны ночы.
Яны шумелі, вось і наважыла зайсці. Там была міліцыя, двое супрацоўнікаў. І Дзіма ім казаў: «Чаго вы на мяне наязджаеце, я ж сам вас выклікаў!». З яго слоў я зразумела, што прапаў ровар, і Дзіма патэлефанаваў у 102», - кажа Ніна Венедыктаўна.
Са слоў суседкі, пра далейшыя падзеі яна дакладна не ведае.
Але атрымліваецца, што Дзмітрыя вывелі з дому і пасадзілі ў той самы міліцэйскі ГАЗ, у адсек для затрыманых.
«Але яго нават не паспелі нікуды адвезці! Праз хвілін можа 20 я гляджу - стаіць той ГАЗ пад домам, а побач аўто хуткай дапамогі. Я выйшла на вуліцу. Сустрэла цешчу Захарчэні. Яна мне кажа: «Дзіма павесіўся!».
Я пытаюся: як, на чым?!
І міліцыянт кажа: «Ён узяў шнурок, завязаў на шыі і рукамі моцна яго зацягнуў. Супрацоўнік сядзеў у машыне, але выратаваць яго не паспеў».
Суседзі - ды і іншыя жыхары Стрыгава - не надта вераць у суіцыд.
«Ён не загінуў, гэта дакладна», - мяркуюць прадаўшчыцы ў мясцовай краме.
Ды і суседка Ніна Венедыктаўна паціскае плячыма: «Можа быць, Дзіма ў машыне абурацца пачаў? Бо выглядае гэта ўсё падазрона, ён жа сам выклікаў міліцыю».
Міліцыя паведаміла, што паводле справы праводзіцца праверка.