Трагедыя падчас салюту ў Менску: новыя факты

Відавочцы паведамляюць аб інцыдэнтах у розных частках горада.

Позна ўвечары 3 ліпеня на ўзбярэжжы Свіслачы ў Менску адбылася трагедыя. Падчас запуску «святочнага» салюту адзін з набоеў разарваўся, аскепкі паляцелі ў бок людзей. У выніку была моцна параненая адная з жанчын, яна загінула на месцы нягледзячы на спробы медыкаў дапамагчы пацярпелай, паведамляе «Радыё Свабода».

Што вядома аб загінулай?

Гэта жанчына 1955 года нараджэння, яна назірала за святочным салютам ля Свіслачы, недалёка ад вуліцы Даўмана. Відавочцы паведамляюць, што пацярпелая была на месцы здарэння разам з дарослай дачкой. Адразу пасля раны пацярпелай спрабавалі дапамагчы супрацоўнікі МНС, якія патрулявалі Свіслач на водным скутэры, праз некалькі хвілін на месца прыбылі медыкі.

Рэанімацыйныя мерапрыемствы працягваліся блізу 30 хвілін, аднак выратаваць жанчыну не ўдалося. Відавочцы распавядаюць аб вялікай колькасці страчанай крыві, аскепак трапіў жанчыне ў шыю і, імаверна, перарэзаў сонную артэрыю.

Інцыдэнты падчас запуску салютаў у іншых раёнах Менска

Вядома, што запускі салютаў не паводле плану адбыліся не толькі ў Парку Перамогі. Са сведчанняў відавочцаў, побач з зямлёй разарваліся салюты таксама ў Чыжоўцы і ва Уруччы. Паведамленняў аб пацярпелых там пакуль няма.

Вядома, што ад месца запуску салютаў да месца, дзе была смяротна параненая загінулая жанчына, было больш за 500 метраў. Шыбы ў дамах па вуліцы Чарвякова аскепкі разбілі на адлегласці больш за кіламетр.

Што вядома пра прычыны выбухаў?

Пакуль ёсць толькі неафіцыйная інфармацыя. Згодна з ёй, некалькі набоеў для святочнага салюту з незразумелых прычын разарваліся невысока над зямлёй адразу пасля запуску. Іх аскепкі паранілі людзей і выбілі вокны ў будынках. Паводле іншай версіі, выбухі набоеў для салюту адбыліся ўнутры пускавых установак і людзей параніла ўжо іх аскепкамі.

На месцы здарэнняў карэспандэнты «Радыё Свабода» бачылі кавалкі пластыка і кардону. Імі даслоўна засыпала ходнікі каля Свіслачы.

Каментар Міністэрства абароны

Рэакцыя ўстановы на трагічнае здарэнне з'явіліся праз дзве гадзіны пасля яго. Менавіта спецыяльнае падраздзяленне Мінабароны займаецца запускамі святочных салютаў.

«Камісія Міністэрства абароны супольна са Следчым камітэтам высвятляе прычыны атрымання траўмаў падчас салюту ў Менску, - гаварылася ў ім. - Пацярпелі 4 чалавекі. З іх адна жанчына атрымала траўму, несумяшчальную з жыццём. Вайсковая ўстанова выказвае спачуванне родным і блізкім загінулай і надасць неабходную дапамогу. Высветлена, што набоі гэтай партыі раней ужо выкарыстоўваліся для салютаў».

Аднак усяго за два дні да трагедыі ў інтэрв'ю агенцтву «Мінск-Навіны» камандзір патрульнай роты каменданцкага батальёна, старшы лейтэнант Аляксей Круглік паведаміў пра «новыя вырабы».

«Сакрэты раскрываць не буду, - сказаў журналістам вайсковец. - Але скажу, што гэтым разам мы выкарыстоўваем новыя вырабы для феерверка, якія раней не паказвалі. Агульную карціну ўбачыце на салюце».