Беларусь прапанавала два варыянты кампенсацыі за «брудную» нафту

«Гомельтранснафта» выставіла свае ўмовы «Транснафце».

Кампанія «Гомельтранснафта Дружба» працягвае перамовы з расейскай манаполіяй «Транснафта» з нагоды кампенсацыі страт праз скарачэнне транзіту нафты. Пра гэта гаворыцца на сайце аператара беларускага адцінку трубаправода.

«Гомельтранснафта Дружба» адзначае, што недаатрыманы прыбытак замінае ёй займацца мадэрнізацыяй трубаправодаў. Для кампенсацыі страт беларуская кампанія прапанавала расейцам да канца года паставіць 59 мільёнаў тон, як было запланавана ў адпаведнасці з дамовай. Дарэчы, у чэрвені 2019 года такія абяцанні былі дадзеныя як пісьмова, так і на вочных сустрэчах у «Транснафты» і Мінэнэрга Расеі.

«За гэты час «Транснафта» не падала дакументальнага пацверджання магчымасці прапампоўкі гэтых аб'ёмаў да канца года. «Гомельтранснафта Дружба» таксама падала пісьмовыя сведчанні з боку заходніх партнёраў аб тым, што фактычна неабходныя спажыўцам аб'ёмы транспартавання па гэтым кірунку значна ніжэйшыя", - адзначаюць у беларускай кампаніі.

Другі варыянт кампенсацыі, які прапануюць у «Гомельтранснафце Дружба», - павялічыць тарыфы на транспартаванне зыходзячы з колькасці недапампаванай нафты.

Беларускі бок падкрэслівае, што страты ўзніклі з яе віны.

Нагадаем, што 19 красавіка «Белнафтахім» паведаміў, што якасць расейскай нафты значна пагоршылася. Ад паставак «бруднай» нафты адмовіліся Польшча, Нямеччына, Украіна і яшчэ некалькі краін. Беларускія нафтаперапрацоўчыя заводы працавалі не на поўную магутнасць. Пастаўкі чыстай нафты аднавіліся толькі ў пачатку траўня.