У Менску таксіст скраў торбу з маёмасцю на $ 10 тысяч
18- 24.07.2019, 18:45
- 17,296
Торба належала сваякам вядомага хакеіста.
У Нацыянальным аэрапорце ў пасажыраў скралі торбу, дзе знаходзілася маёмасць на суму $ 10 тысяч, расказалі карэспандэнту агенцтва «Мінск-Навіны» у Менскім аддзеле ўнутраных спраў на паветраным транспарце.
У самыя кароткія тэрміны супрацоўнікі міліцыі знайшлі несумленнага таксіста, які забраў забыты пасажырамі багаж.
- З Нью-Ёрка прыляцела сям'я, сваякі вядомага хакеіста. Дабраўшыся да месца жыхарства, яны выявілі, што не стае адной торбы. Вярнуўшыся на аэравакзал, нідзе яе не знайшлі і звярнуліся па дапамогу ў міліцыю, - распавёў начальнік аддзялення крымінальнага вышуку МАУС на паветраным транспарце Уладзімір Рудзько.
Праз запісы з камер відэаназірання высветлілі, што торба была пакінутая на вазку, яе забраў кіроўца таксі, які потым з'ехаў у кірунку Менска. Яго асобу хутка высветлілі, а надвечар затрымалі - кіроўца зноў прывёз пасажыраў у аэрапорт.
У торбе ляжалі грошы, каштоўнасці, мабільны тэлефон ды іншыя прылады. На шчасце, таксіст не паспеў распарадзіцца чужой маёмасцю, толькі дастаў з мабільніка SIM-картку, якую пазней знайшлі ў ягоным аўтамабілі.
- Затрыманы спачатку не прызнаваў віну, сцвярджаў, што нічога чужога не браў, аднак адразу прызнаўся, калі ўбачыў сябе на відэазапісе, - працягвае спадар Уладзімір. - У дачыненні да мужчыны распачалі крымінальную справу паводле ч.3 арт.205 Крымінальнага кодэкса («Крадзеж»).
Усю выкрадзеную маёмасць вярнулі ўладальнікам.