Беларускія ВНУ распавялі пра самыя папулярныя спецыяльнасці

Конкурс на некаторых факультэтах - больш за дзесяць чалавек на месца.

Прыём дакументаў на бюджэт скончыўся - заўтра ВНУ пачнуць залічэнне. Цяпер прыёмныя камісіі працуюць над падлікамі, афармляюць спісы будучых студэнтаў і рыхтуюцца падпісваць загады. Але папярэднія вынікі ўжо ёсць: конкурс на некаторых факультэтах - больш за дзесяць чалавек на месца. Больш за ўсё абітурыенты хочуць стаць дызайнерамі, айцішнікамі і вайсковымі лекарамі, піша «Онлайнер».

БДУ: 16,3 чалавека на месца - яны хочуць стаць дызайнерамі

Сярэдні конкурс у галоўнай ВНУ краіны сёлета - 1,78 чалавека на месца. Ва ўніверсітэце кажуць, што год таму ён быў такім жа.

Самы высокі конкурс быў на творчых спецыяльнасцях, дзе трэба здаваць два ЦТ і ўнутраны іспыт. Больш за ўсё чалавек на месца (16,3) на камунікатыўны дызайн. Карыстаецца попытам і дызайн прадметна-прасторавага асяроддзя - 13,7 чалавека на месца.

Сярод спецыяльнасцяў, дзе патрэбныя тры сертыфікаты ЦТ, традыцыйна папулярныя міжнародныя адносіны. Тут конкурс - 2,5 чалавека на месца. Сюды падалі дакументы тыя, хто набраў ад 251 бала на тэсціраванні.

БДУІР: самая папулярная спецыяльнасць звязана з кампутарнымі гульнямі

6,7 чалавека на месца - такі максімальны конкурс на спецыяльнасці «інфармацыйныя сістэмы і тэхналогіі (у гульнявой індустрыі)», папярэдні прахадны бал тут - 364. Сто адзін чалавек падаў дакументы на гэтую спецыяльнасць, а месцаў 15.

Акрамя таго, у БДУІР паступаюць на электронны маркетынг - з прахадным балам 363. Конкурс тут 3,2 чалавека на месца, а 3,68 - на спецыяльнасці «праграмнае забеспячэнне інфармацыйных тэхналогій». Тут прахадны бал ацэньваюць у 359.

БНТУ: сярэдні конкурс - два чалавекі на месца

Максімальны бал, з якім у БНТУ прыйшоў абітурыент, - 377. Натуральна, ён абраў спецыяльнасць у сферы ІТ. Максімальны конкурс ВНУ - пяць і больш чалавек на месца: на факультэтах ІТ і робататэхнікі, прамысловага менеджменту, а таксама архітэктурным.

У прыёмнай камісіі ўніверсітэта распавялі, што сярэдні конкурс у БНТУ - два чалавекі на месца. Дарэчы, у ВНУ ёсць спецыяльнасць з вельмі нізкім парогавым балам на бюджэт - 109. Сюды ідуць тыя, хто будзе займацца караблебудаваннем.

МДЛУ: самыя папулярныя мовы - ангельская і французская

У МДЛУ самай папулярнай была спецыяльнасць выкладчыка на факультэце раманскіх моў. На 35 бюджэтных месцаў абітурыенты падалі 77 заяў. Тыя, хто паступіць, будуць вывучаць французскую і другую замежную.

Самыя высокія прахадныя балы - больш за 371 - на перакладчыцкім факультэце. З такімі вынікамі прыходзяць абітурыенты, каб вывучаць ангельскую мову і другую замежную.

БДМУ: вайсковая медыцына і стаматалогія - у топе

У медуніверсітэце самы цяжкадаступны факультэт - вайскова-медыцынскі, тут толькі тры месцы. Пасля яго спецыялісты будуць працаваць ва ўнутраных войсках МУС. Сёлета конкурс склаў больш за тры чалавекі на месца, прахадны бал - 322. На тры бюджэтныя месцы сюды падаліся дзесяць чалавек. На астатніх факультэтах на месца прэтэндуюць у сярэднім два абітурыенты.

Самы высокі прахадны бал у БДМУ - на стаматалагічны. Па агульным прыёму абітурыенту трэба набраць мінімум 370 балаў, па мэтавым - 321.

Як распавялі ў прыёмнай камісіі ўніверсітэта, дакументы ім прынеслі 1200 абітурыентаў, хоць план прыёму - 615.

МДПУ ім. Шамякіна: «У нас усе спецыяльнасці папулярныя»

Найбольш высокі прахадны бал у мазырскім педзе (285) на спецыяльнасць «замежныя мовы (ангельская)». Але гэтыя парогі, запэўніваюць у ВНУ, «вельмі-вельмі прыблізныя». На месца пад сонцам тут прэтэндуюць два чалавекі на месца. Найменшы конкурс, дарэчы, - на матэматыку і інфарматыку: на 22 месцы прыйшло 23 заяўкі. Папярэдні прахадны бал тут - 150.