Сіноптыкі распавялі пра анамаліі надвор’я гэтага года ў Беларусі

Да канца месяца будзе 22...29°С.

Такі гарачы чэрвень, як сёлета, у Беларусі быў упершыню з 1945 года. Максімальную тэмпературу зафіксавалі ў Жлобіне - плюс 34,7 градуса, піша tut.by. З рэкордаў гэтага года таксама самы засушлівы красавік, такога не было за апошнія 75 гадоў метэаназіранняў. Анамальнай тэмпературы ў ліпені спецыялісты Белгідрамета не прагназуюць, да канца месяца абяцаюць ад 22 да 29 цяпла, але перыядычна будуць і навальніцы, і дажджы.

- Паводле кліматычных характарыстык ліпень у нас самы цёплы месяц у годзе і таксама самы вільготны, - распавёў на прэс-канферэнцыі начальнік службы метэаралагічных прагнозаў Белгідрамета Аляксандр Бяганскі. - «Самы цёплы» пакуль не атрымліваецца, але «самы вільготны» - падтрымлівае рэнамэ. У найбліжэйшы перыяд прагназуецца павышэнне тэмпературы. У гэтыя выхадныя, 20 і 21 ліпеня, максімальная тэмпература паветра ў большасці раёнаў чакаецца ад 22 да 29 градусаў цяпла. Ападкаў прагназуецца няшмат. У пачатку наступнага тыдня прагназуюцца дажджы, звязаныя з атмасфернымі франтамі, якія будуць перамяшчацца да нас з тэрыторыі Польшчы, але тэмпературны фон будзе блізкім да кліматычнай нормы. Да канца месяца прагназуецца, што тэмпература паветра ў начны час будзе ў асноўным ад 10 да 17 градусаў, максімальная тэмпература ўдзень - ад 21 да 28 градусаў. Разам з тым прагназуюцца кароткачасовыя навальнічныя дажджы.

- Якое надвор'е будзе ў жніўні? - пацікавіліся ў спецыяліста.

- Пакуль даволі складана адказаць на пытанне, такія доўгатэрміновыя прагнозы мы пакуль не давалі, - заявіў Бяганскі. - Але агулам, як паказвае статыстыка, жнівень, асабліва яго першая палова, бывае не толькі цёплым, але нават гарачым. Цалкам магчыма, што і сёлета нейкія асобныя дні могуць быць з тэмпературай плюс 30 і вышэй. Разам з тым трэба разумець, што ў жніўні ўжо пачынаецца працэс паніжэння сярэднямесячнай тэмпературы. У трэцяй дэкадзе тэмпература ніжэйшая, чым у другой. І значна ніжэйшая, чым у першай. Пакуль нам бы атрымаць асалоду ад цяпла, якое будзе ў канцы ліпеня.

Паводле ацэнкі спецыялістаў Белгідрамета, першае паўгоддзе 2019 было вельмі цёплым, сярэдняя тэмпература паветра склала 7,1 градуса. Гэтае значэнне вышэйшае за норму на 2,3 градуса. Агулам у краіне так цёпла бывае адзін раз на 30-35 гадоў. Апошні раз такое цёплае паўгоддзе адзначалася ў 1989 годзе, яго тэмпература склала 7,4 градуса. Сёлета халодным быў толькі студзень, сярэдняя тэмпература якога ў краіне склала мінус 5,1 градуса. Самая нізкая тэмпература паўгоддзя была адзначаная 28 студзеня ў Брагіне - мінус 24,8 градуса. Люты быў цёплым, станоўчае адхіленне ад нормы склала 4,4 градуса.

- Такая цёплая вясна, як сёлета, бывае ў Беларусі раз на 25 гадоў. Тэмпература была на 1,9 градуса вышэйшай за норму, - адзначыла начальніца аддзела вывучэння змен клімату службы метадычнага забеспячэння гідраметэаралагічных назіранняў, вывучэння змен клімату і фонду звестак Наталля Клявец. - Лета пачалося з вельмі гарачага чэрвеня. Сярэдняя тэмпература паветра склала плюс 21 градус, гэта на 4,6 градуса вышэй за норму. Такі цёплы чэрвень адзначаецца ўпершыню з 1945 года. Максімальная тэмпература паветра за паўгоддзе адзначаная 12 чэрвеня ў Жлобіне - плюс 34,7 градуса. Па характары ўвільгатнення мы назіралі дэфіцыт ападкаў, выпала 78% ад нормы. Найбольш увільготненым былі студзень і травень (120 і 135% нормы адпаведна). Самым засушлівым за апошнія 75 гадоў стаў красавік.