Расейскія мільянеры багацеюць у пяць разоў хутчэй за замежных
8- 17.07.2019, 15:32
- 7,857
Больш за палову прыватных зберажэнняў забяспечылі расейцы з багаццем ад мільёна даляраў.
Прыватны капітал у Расеі ў 2018 годзе рос амаль у пяць разоў хутчэй, чым агулам у свеце: 9% супраць 2%. Пра гэта паведамляе «Інтэрфакс» са спасылкай на даследаванне The Boston Consulting Group.
Больш за палову прыватных зберажэнняў забяспечылі расейцы, багацце якіх перавышае мільён даляраў.
«Прыватны капітал у Расеі сканцэнтраваны ў асноўным у руках людзей з багаццем, большым за адзін мільён даляраў - усяго на іх прыпадае 55% ашчаджэнняў. Пры гэтым сегмент звышбагатых (з багаццем, большым за 100 млн даляраў) стаў самым буйным: 40% ашчаджэнняў, у той час як у свеце ён дасягае толькі 12%, а ва Усходняй Еўропе - 28%», - цытуе даследаванне РІА «Новости».
Яшчэ 39% прыватнага капіталу належыць жыхарам Расеі з багаццем да 250 тысяч даляраў.
Зберажэнні заможныя расейцы трымаюць у асноўным у валюце і на дэпазітах - 62% сродкаў захоўваюцца менавіта ў гэтай форме, у свеце гэты паказчык складае 28%.
Больш за чвэрць расейцаў трымаюць свае капіталы на замежных рахунках - 27,2% (супраць 26,8% у 2013 годзе).
Пры гэтым 90% сукупных фінансавых актываў, каштоўных папер, тэрміновых укладаў, існых рахункаў і гатоўкі знаходзяцца ў руках 3% жыхароў краіны, а 65% сем'яў не могуць сабе дазволіць мець зберажэнні.
За 2018 год колькасць даляравых мільянераў у Расеі вырасла на 6%: са 189 тысяч чалавек да 200 тысяч, падлічыла кансалтынгавая Capgemini ў штогадовым дакладзе World WealthReport.