У жыхароў РФ выраслі выдаткі на ежу

Выдаткі расейцаў на ежу павялічыліся, а іншыя выдаткі – паменелі.

Жыхары Расеі ў другім квартале 2019 года выдаткавалі на прадукты харчавання крыху больш, чым раней – 38,9% сваіх прыбыткаў супраць 38,2% за той жа перыяд летась. Пра гэта ў суботу, 13 ліпеня, паведамляе РБК са спасылкай на штоквартальнае апытанне Ашчадбанка "Спажывецкі індэкс Іванова". Пры гэтым дзель выдаткаў на камунальныя паслугі нязначна знізілася – 15,2% (2019 г.) супраць 15,4% (2018).

Зменшыліся і іншыя выдаткі, якія расейцы дазваляюць сабе: выдаткі на адзенне скараціліся на 0,3% (10% у 2019 годзе – 9,7% у 2018-м), на паслугі аховы здароўя – на 0,5% (7,1% – 6,6%), на побытавыя тавары – на 0,3% (6% – 5,7%). Мацней за ўсё ўпалі выдаткі на адпачынак і падарожжа – на 1 адсотак (5,8% – 4,8%). Пры гэтым дзель выдаткаў на выплату адсоткаў у крэдытах засталася нязменнай – 6,6%.

У даследаванні таксама паказваецца змяншэнне ашчаджэнняў грамадзянаў, што сведчыць пра падзенне рэальных прыбыткаў жыхароў Расеі. Пра тое, што ў іх няма якіх-небудзь ашчаджэнняў, паведамілі 43% расейцаў, што на 2 адсоткі больш, чым год таму, а сярэдні аб'ём ашчаджэнняў жыхароў краіны знізіўся на 13 адсоткаў. Пры гэтым растуць і пазыкі расейцаў – сярэдні аб'ём пазык увесь час павялічваецца з другога квартала 2018 года. За год сярэдні аб'ём запазычанасці вырас на 10 адсоткаў, пры гэтым іпатэчнае крэдытаванне ў гэты паказнік не ўключанае.