Воршу накрыла хваляй атрутнага газу
6- 7.06.2019, 17:16
- 22,039
Было зафіксавана перавышэнне нарматыву ў 2,5 разы.
У канцы траўня і ў пачатку чэрвеня ў Воршы некалькі дзён фіксавалася перавышэнне нарматыву якасці па ўтрыманні ў паветры дыаксіду азоту.
Як паведамляе "Віцебская Вясна" са спасылкай на news.vitebsk.cc 27 траўня ў раёне Моладзевай вуліцы было зафіксавана перавышэнне нарматыву ў 2,5 разы, а 28 траўня ў раёне вуліцы Леніна канцэнтрацыя гэтага газу складала 1,7 ГДК, забор паветра праводзіліся ў гадзіну ночы. 29 траўня ў раёне Моладзевай вуліцы ў 7:00 зафіксаванае перавышэнне нарматыву якасці ў 2,6 разы. Таксама ў раёне вул. Леніна 3 чэрвеня ў тэрмін адбору проб 01:00 зафіксавана перавышэнне нарматыву якасці ў 1,7 разы ў дыаксідзе азоту. У першых двух выпадках у Воршы быў паўднёва-заходні вецер, а ў трэцім - паўднёвы, паведамляе Рэспубліканскі цэнтр гідраметэаралогіі, кантролю радыеактыўнага забруджвання і маніторынгу навакольнага асяроддзя.
Дыяксід азоту ўжываецца пры вытворчасці кіслот, а таксама выкарыстоўваецца як акісляльнік у ракетным паліве. Гэта атрутны газ чырвона-бурага колеру і без паху.
Часам дыяксід азоту называюць «лісіным хвастом» праз яго буры колер. Варта адзначыць, што гэта рэчыва высокатаксічнае, нават у невялікіх канцэнтрацыях яно раздражняе дыхальныя шляхі, а ў вялікіх - выклікае ацёк лёгкіх. Акрамя таго, дыяксід азоту выклікае змены складу крыві, між іншым, памяншае ўтрыманне ў ёй гемаглабіну.