Акцыі Расеі завагаліся ў чаканні сустрэчы Трампа і Сі Цзіньпіна

Расейскі рынак акцый пачаў падзенне.

Расейскі рынак акцый, які ўстанавіў у мінулы чацвер гістарычны рэкорд у індэксе Маскоўскай Біржы, не ўтрымаўся на дасягнутых вышынях, паведамляе finanz.ru.

На фоне значнага ўзмацнення напружанасці на Блізкім Усходзе, дзе ЗША ледзь не ўдарылі па Іране пасля нападу на беспілотнік над Персідскай затокай, і пад грузам змрочных чаканняў ад гандлёвых перамоў Дональда Трампа з Кітаем фондавыя індэксы РФ зніжаюцца на таргах у аўторак, вынікаючы за акцыямі EM.

Індэкс МасБіржы асеў на 0,55%, а падчас ранішніх таргоў апускаўся да мінімальнай за тыдзень адзнакі на 2738,99 пункта. Індэкс РТС, які адлюстроўвае даляравую капіталізацыю 40 найбуйнейшых расейскіх кампаній, страціў 0,62%, або 1 млрд даляраў у пераліку на капіталізацыю.

За паўтары гадзіны да закрыцця таргоў у мінусе застаюцца большасць блакітных фішак: Ашчадбанк таннее на 1,62%, «Раснафта» - на 0,91%, «Газпрам» - на 0,77%. Растуць акцыі ЛУКОЙЛа (0,41%) і ВТБ (0,15%).

«Займаць пазіцыю чакання інвестараў на сусветных фондавых рынках настройвае высокая нявызначанасць вакол вынікаў будучага саміту лідараў G-20 у канцы тыдня і падвышэнне напружанасці ў дачыненнях паміж ЗША і Іранам, - канстатуе галоўны аналітык Прамсвувязьбанка Раман Антонаў. - На гэтым фоне захоўваецца высокі попыт на ахоўныя актывы, сярод іншага, на золата».

Кошт каштоўнага металу ў аўторак абнавіў максімумы з 2013 года - 1442 даляры за ўнцыю, дадаўшы 13% з пачатку месяца.

Напярэдадні ЗША ўвялі санкцыі супраць духоўнага лідара Ірана аяталы Хаменеі, адрэзаўшы як яго самога, так і ўсю ягоную адміністрацыі ад доступу да глабальнай даляравай сістэмы.

«Улічваючы, што інструменты эканамічнага ціску на Іран практычна вычарпаныя, персанальныя санкцыі можна расцэньваць як сімвалічны зваротны манеўр на дзеянні Ісламскай рэспублікі, але ў той жа час гэта, магчыма, абмяжуе дыпламатычныя магчымасці для ўрэгулявання канфлікту паміж краінамі і тым самым павышае геапалітычную напружанасць, якая транслюецца на сусветныя рынкі», - адзначае Антонаў.

«Момантам праўды» для рынкаў і ў тым ліку расейскага стане саміт кіраўнікоў краін «Вялікай дваццаткі» 28-29 чэрвеня ў горадзе Асака, дзе Дональд Трамп і Сі Цзіньпін павінны вызначыцца: ці працягваць тарыфную вайну, якая катком прайшлася па сусветным гандлі і якая, з разлікаў МВФ, будзе каштаваць глабальнай эканоміцы блізу 0,5% ВУП у 2020 годзе. У грашовым вылічэнні гэтая лічба эквівалентная 455 млрд даляраў, што супастаўна памеру эканомікі ПАР.

«Напярэдадні саміту ніхто не чакае добрых навінаў», - кажа галоўная эканамістка Альфа-банка Наталля Арлова: цяпер цалкам магчымы як сцэнар, што такая сустрэча адбудзецца і прывядзе да часовага замірэння ў гандлёвай вайне, як і сцэнар, што яе наогул не будзе.

Пры гэтым нават калі сустрэча адбудзецца, яна, магчыма, не зможа прадухіліць пагаршэнне амерыкана-кітайскіх стасункаў, якое стала набіраць абароты пасля скасавання сустрэчы двух кіраўнікоў у траўні, разважае экспэрт.

З тых часоў Трамп, нагадаем, падняў ужо дзейныя тарыфы на імпарт з Кітая на суму 200 млрд даляраў і пачаў рыхтаваць увядзенне мыт на тавары яшчэ на 300 млрд даляраў, а таксама адрэзаў ад амерыканскіх тэхналогій Huawei.

Са свайго боку, Кітай увёў тарыфы на амерыканскія тавары і выпусціў спіс нядобранадзейных замежных кампаній, а таксама прыстрашыў абмежаваць экспарт рэдкіх металаў у ЗША.

Гаворка ідзе пра групу з 17 металаў, якія выкарыстоўваюцца ў вытворчасці высокіх тэхналогій і на рынку якіх Кітай кантралюе значную частку сусветнай прапановы. Квоты на іх экспарт выкарыстоўваліся Кітаем да 2015, потым былі скасаваныя ў выніку перамоў з СГА.