Ва Украіне каманда Зяленскага апублікавала відэа са сваімі дасягненнямі
27- 24.06.2019, 12:45
- 16,517
Дасягненняў у прэзідэнта Украіны налічылі 20 пунктаў.
У камандзе ў прэзідэнта Украіны Уладзіміра Зяленскага зрабілі справаздачу перад народам Украіны за першы месяц ля стырна краіны. На Facebook-старонцы "Каманда Зяленскага" з'явіўся ролік, у якім пералічваецца тое, што ў Адміністрацыі прэзідэнта паставілі сабе і гаспадару Банкавай у заслугу, паведамляе liga.net.
Дасягненняў у кіраўніка дзяржавы налічылі 20 пунктаў. Вось яны:
- "аднавіў паўнавартасную працу кансультацыйнай групы ў Менску";
- "запэўніў міжнародных партнёраў у тым, што курс Украіны на еўраінтэграцыю нязменны";
- "атрымаў ад еўралідараў падтрымку пазіцыі Украіны ў вызваленні палонных і санкцыйнага ціску на Расею";
- "дамовіўся аб аднаўленні нармандскага фармату перамоў";
- "даў выразна зразумець, што перамоў з сепаратыстамі не будзе";
- "падаў у Раду 16 законапраектаў, якія абяцаў падчас перадвыбарчай кампаніі";
- "унёс у Раду ўсёабдымны закон аб імпічменце";
- "унёс у Раду закон аб пакаранні за незаконнае ўзбагачэнне чыноўнікаў, які прадугледжвае канфіскацыю неправамерна нажытай маёмасці";
- "на запыт грамадства распусціў Раду VIII склікання, выйграўшы судовы працэс у КСУ - пачаў працэс маштабнай перазагрузкі сістэмы ўлады";
- "пачаў перазапуск судовай рэформы";
- "падаў у Раду законапраект аб скасаванні формулы Ратэрдам + і яе ператварэнні ў Ратэрдам-";
- прэзентаваў айчынным і замежным інвестарам стратэгію аднаўлення Данбаса, пачынаючы з дэакупаваных тэрыторый";
- "развеяў міфы пра дэфолт";
- "далучыў вялікі бізнэс да развязання значных сацыяльных праблем (закупка "хуткіх" для лякарняў, набыццё жылля для сем'яў палонных маракоў) без зваротных абяцанняў і абавязацельстваў ад улады";
- "прымусіў Кабмін і міністэрства выплаціць запазычанасці ў заробках шахцёрам";
- "адмяніў абавязковую школьную форму";
- "скасаваў вялізныя штрафы за парушэнні правілаў працы з гатоўкай, якімі абкладвалі бізнэс з 1995 года";
- "канчаткова ўрэгуляваў выкарыстанне пробліскавых маячкоў: яны дазволеныя толькі для вузкага кола спецмашын, а не для дэпутацкіх або міністэрскіх лімузінаў";
- "адкрыў вуліцу Банкавую для людзей";
- "устанавіў новую норму звароту да прэзідэнта - па імені".