Павел Клімкін выставіў жорсткі ультыматум Крамлю

Расея павінна да 25 чэрвеня вызваліць украінскіх маракоў.

Крэмль павінен падаць да 25 чэрвеня справаздачу аб вызваленні вайсковых палонных маракоў, інакш Украіна пачне новую хвалю ціску на Расею на міжнароднай арэне. Такі ультыматум высунуў міністр замежных спраў Украіны Павел Клімкін у інтэрв'ю ўкраінскаму «Пятаму каналу», нагадаўшы, што пытанне Украіны будзе падымацца на сустрэчы прэзідэнтаў ЗША і Расеі Дональда Трампа і Уладзіміра Пуціна.

«Гэты ціск будзе і кароткатэрміновым, бо нам трэба дасягнуць выніку. І будзе сярэднетэрміновым, таму што вынікам гэтага будзе абмежаванне расейскай марской актыўнасці, вайсковай актыўнасці», - растлумачыў Клімкін. Паводле ягоных слоў, запланаваны шырокі спектр дзеянняў, але пра іх ён казаць не будзе, бо гэтая інфармацыя павінна застацца за камерай.

Раней Міжнародны трыбунал марскога права ААН задаволіў пазоў Украіны і абавязаў Расею неадкладна вярнуць тры ўкраінскія вайсковыя марскія караблі і адпусціць 24 палонных маракоў.

Маскоўскі гарадскі суд адмовіўся выконваць патрабаванні Міжнароднага трыбунала ААН і пакінуў пад вартай 24 палонных украінскіх маракоў.

Прэзідэнт Украіны Уладзімір Зяленскі заявіў, што не збіраецца рабіць далейшых крокаў для вызвалення ўсіх 24 маракоў у Расеі, бо Міжнародны трыбунал ААН ужо прызнаў незаконнасць дзеянняў Крамля.