На паўторных выбарах мэра Стамбула зноў перамог апазіцыянер

Паплечнік Эрдагана, які балатаваўся на пасаду мэра, публічна прызнаў сваю паразу і павіншаваў свайго апанента з перамогай.

Кандыдат ад апазіцыйнай Народна-рэспубліканскай партыі Экрэм Імамоглу перамагае на паўторных выбарах мэра Стамбула.

Пасля апрацоўкі 98% бюлетэняў ён набірае 53,9% галасоў, паведамляе ВВС са спасылкай на Цэнтрвыбаркам краіны.

Кандыдат ад кіроўнай Партыі справядлівасці і развіцця і найбліжэйшы паплечнік прэзідэнта Турцыі Раджэпа Таіп Эрдаган Біналі Ілдырым набірае 45,2% галасоў.

Ён ужо публічна прызнаў сваю паразу і павіншаваў свайго апанента з перамогай.

"Я віншую свайго канкурэнта і зычу яму поспеху. Гэтыя выбары яшчэ раз паказалі, што дэмакратыя ў нашай краіне безумоўная. Хачу, каб Імамоглу кіраваў Стамбулам і прыкладаў усе намаганні для служэння гораду і яго жыхарам", - сказаў Ілдырым у эфіры тэлеканала NTV.

Стамбул - ключавы горад для прэзідэнта Турцыі Раджэпа Таіпа Эрдаган. Ён сам пачынаў тут вялікую палітычную кар'еру, перамогшы на выбарах мэра ў 1994 годзе.

Акрамя таго, велізарны мегаполіс з насельніцтвам блізу 17 мільёнаў чалавек - фінансавы, культурны і эканамічны цэнтр Турцыі. Сам Эрдаган у бытнасць мэрам не раз паўтараў: "Калі ты перамог у Стамбуле, ты перамог у Турцыі".

Вынікі выбараў мэра ў сакавіку гэтага года, перамогу на якіх таксама атрымаў Экрэм Імамоглу, былі ануляваныя. Цэнтрвыбаркам краіны звязаў гэта з тым, што некаторыя сябры выбарчых камісій былі прызначаныя не з ліку дзяржаўных службоўцаў, а таксама праз наяўнасць непадпісаных пратаколаў.

Пасля гэтага Народна-рэспубліканская партыя заявіла, што ізноў вылучыць на паўторных выбарах кандыдатуру Экрэма Імамоглу.