Чаму беларускія аператары сінхронна падвышаюць тарыфы на мабільную сувязь

З 1 ліпеня летні «падарунак» сваім абанентам падрыхтавалі два асноўныя аператары сувязі.

Мы не ведаем, ці ўзгадняюць два асноўныя беларускія мабільныя аператары velcom | A1 і МТС свае дзеянні, або ў іх гэта атрымліваецца выпадкова, але ўжо другі год запар падвышэнне тарыфаў на свае паслугі яны праводзяць адначасова, піша «Экономическая газета».

З 1 ліпеня летні «падарунак» сваім абанентам падрыхтавалі абодва, прычым аднолькавая верхняя мяжа падвышэння - не больш за 4,3% да ўзроўню сённяшніх тарыфаў, здавалася б, сведчыць пра відавочную «коштавую змову». Аднак на самай справе ніякай змовы не было. Як паведамлена на сайце МТС, змяненне тарыфаў на асноўныя паслугі - абаненцкую плату, галасавыя выклікі, мабільную перадачу звестак і г.д. - будзе праводзіцца ў межах, устаноўленых рэгулятарам у адпаведнасці з заканадаўствам Беларусі.

Адсюль можна зрабіць простую выснову: калі б не абмежаванні, устаноўленыя рэгулятарам, якім у Беларусі з'яўляецца Міністэрства антыманапольнага рэгулявання і гандлю (МАРГ), то падвышэнне асобных тарыфаў магло быць і больш значным. Праўда, раней паведамлялася, што МАРГ займаецца толькі коштавым рэгуляваннем паслуг галасавой сувязі, а тарыфы на іншыя паслугі, у тым ліку на доступ у Інтэрнэт, фармуюцца свабодна.

Пра канкрэтныя сумы павышэння на кожным з тарыфных планаў можна даведацца на сайтах указаных аператараў. У аператара velcom | A1 мы знайшлі інфармацыю аб тым, што абаненты тарыфных планаў лінейкі «Привет» будуць плаціць больш на суму ад 9 капеек да 40 капеек за месяц у залежнасці ад абранага плана. Маркетолагі гэтага аператара прадугледзелі і некаторыя прыемныя бонусы для асобных абанентаў. Напрыклад, застанецца нязменнай абаненцкая плата за так званыя моладзевыя тарыфы лінейкі lemon, тарыфы для планшэтаў і маршрутызатараў лінейкі «Безліміт» і тарыфы для юрыдычных асоб лінейкі «Бізнэс-план».

Што да аператара мабільнай сувязі МТС, то яго прэс-служба не стала праводзіць дадатковую піяр-акцыю, звязаную са змяненнем тарыфаў, а проста адправіла ўсіх, хто цікавіцца новымі тарыфамі на адпаведную частку свайго сайта.