Тэхналогіі будучыні на Ле Буржы: электрычныя беспілотнікі і рухавікі, якія зменяць самалёты

На Парыжскім авіясалоне Ле Буржы заключаны першы ў гісторыі кантракт на пастаўку электрычных самалётаў.

Дзевяцімесны самалёт Alice ізраільскай кампаніі Eviation на выставе не ўдзельнічае ў лётнай праграме, яго прататып паказваюць на статычнай экспазіцыі. Аднак кампанія Cape Air наважыла купіць «двухзначны лік» такіх машын у будучыні коштам па 4 млн даляраў за кожны, піша BBC.

Кампанія разлічвае стварыць дзевяцімесны самалёт, які зможа пераадольваць адлегласць да 1000 кіламетраў з хуткасцю прыкладна 440 кіламетраў у гадзіну. Працэс сертыфікацыі кампанія плануе прайсці да канца 2021, сказаў на прэс-канферэнцыі ў аўторак кіраўнік Eviation Омер Бар-Ёхана, паведамляе CNBC.

Alice прыкметна адрозніваецца сваёй кампаноўкай ад «класічных» самалётаў. Два яго рухавікі размешчаны на канцах крыла, яшчэ адзін - у самым хвасце. І ўсе яны абсталяваныя штурхальнымі шрубамі.

Ізраільская кампанія абрала для свайго самалёта электрарухавікі амерыканскай фірмы magniX.

Гэты самалёт - не адзіны электрычны лятальны апарат на Ле Буржы сёлета. Якія яшчэ падобныя праекты прывезлі на авіясалон?

Электрычнасць на Ле Буржы

У Парыжскім авіясалоне сёлета ўдзельнічаюць усяго чатыры электрычныя апараты. Адзін з іх - у лётнай праграме.

Дзве машыны - ад сусветных авіяцыйных гігантаў Airbus і Boeing. Абедзве кампаніі прывезлі на Ле Буржы прататып электрычнага беспілотнага лятальнага апарата. Апроч іх на салоне прадстаўлены славенскі двухмесны вучэбна-трэніровачны самалёт Pipistrel Alpha Electro.

Яшчэ адна кампанія - magniX - прадставіла на выставе электрычныя авіяцыйныя рухавікі, ці ледзь не самую важную частку тэхналогіі, якая ў будучыні, як мяркуюць экспэрты, можа змяніць свет транспарту.

MagniX сваімі рухавікамі разлічвае змяніць традыцыйныя пасажырскія і грузавыя самалёты на лініях працягласцю да паўтары тысячы кіламетраў.

«Наш дэбют на Парыжскім авіяшоў азначае, што мы зрабілі яшчэ адзін крок да пачатку выкарыстання цалкам электрычнага паветранага транспарту ў 2022 годзе», - заявіў кіраўнік кампаніі Роэй Ганзарскі (Roei Ganzarski).

Кампанія ўжо працуе з канадскім аператарам Harbour Air, пераводзячы яе лёгкія гідрасамалёта на электрычную цягу.

Адна з галоўных праблем, з якімі сутыкнуліся вытворцы электрычных авіяцыйных сістэм - абмежаванне далёкасці праз невысокую ёмістасць акумулятараў пры даволі высокім узроўні спажывання электрычнасці рухавікамі апаратаў.

Гэтую праблему можна развязаць, выкарыстоўваючы гібрыдныя энэргетычныя ўстаноўкі, у якіх звычайныя авіярухавікі, якія выкарыстоўваюць традыцыйнае гаручае, круцяць электрагенератар. Аднак гэта рашэнне пазбавіць апарат той перавагі, якія дае чыста электрычнае развязанне. Да прыкладу, у гібрыдных вышэйшы ўзровень шкодных выкідаў і шуму. Акрамя таго, на апаратах з гібрыднымі рухавікамі меншая хуткасць.

І хоць больш простым развязаннем зараз выглядае стварэнне невялікага апарата для палётаў на блізкія адлегласці, у свеце актыўна працуюць адразу некалькі стартапаў у галіне «паўнавартасных» электрычных самалётаў.

Vahana і PAV ад Boeing і Airbus

Airbus і Boeing самастойна распрацоўваюць праекты ў гэтай галіне, а таксама падтрымліваюць іншыя стартапы.

На авіясалон Ле Буржы кожная кампанія прывезла па беспілотнаму пасажырскаму апарату, які ў будучыні можа стаць, напрыклад, гарадскім паветраным таксі.

Дрон Vahana кампаніі Airbus, як і Autonomous Passenger Air Vehicle карпарацыі Boeing ужо здзейснілі першыя тэставыя палёты, але ў Парыжы яны былі прадстаўлены толькі ў наземнай экспазіцыі.

Праект інавацыйнага цэнтра Airbus у Крамянёвай даліне A³ (вымаўляецца як «А» у кубе») працуе над праектам пасажырскага дрона ўжо некалькі гадоў.

Па сваёй схеме Vahana - канвертаплан, то ёсць лятальны апарат, які ўзлятае як гелікоптэр, а затым разварочвае рухавікі і далей рухаецца як самалёт.

Autonomous Passenger Air Vehicle выкарыстоўвае схему «коптэра», гэта значыць апарата з нерухома замацаванымі рухавікамі і шрубамі, якія накіраваныя ўверх.

Ціхі палёт

Лётная праграма на авіясалоне - не самае ціхае мерапрыемства. Нават грамадзянскія рэактыўныя авіялайнеры з сучаснымі ціхімі рухавікамі на ўзлёце шумяць даволі гучна.

На іх фоне невялікі белы самалёт Alpha Electro славенскай фірмы Pipistrel, які лятае амаль бязгучна, глядзіцца трохі дзіўна.

Pipistrel стварае адразу некалькі розных электрычных самалётаў. Alpha Electro быў створаны для навучання будучых пілотаў.

Уся структура апарата была падпарадкаваная задачы зніжэння вагі з тым, каб падоўжыць час яго знаходжання ў паветры - падчас пасадкі было відаць, што нават невялікі бакавы вецер разварочвае яго.

Тым не менш, як сцвярджаюць стваральнікі, самалётам даволі проста кіраваць і ён можа знаходзіцца ў паветры адну гадзіну, пакідаючы пасля гэтага яшчэ рэзерв энэргіі на 30 хвілін палёту.