Краіны Балтыі адключацца ад расейскіх электрасетак

Эстонія, Латвія і Літва падключаць свае энэргасеткі да сеткі ЕЗ праз Польшчу.

У чацвер, 20 чэрвеня, прэм'ер-міністры Латвіі, Літвы, Эстоніі і Польшчы разам з прадстаўнікамі Еўракамісіі прынялі пастанову аб адключэнні краін Балтыі ад энэргасістэмы Расеі.

Пра гэта паведамляецца ў прэс-рэлізе Еўракамісіі.

Як паведамляецца, прэзідэнт Еўракамісіі Жан-Клод Юнкер і віцэ-прэзідэнт Мараш Шэфчавіч разам з кіраўнікамі ўрадаў балтыйскіх краін і Польшчы перад самітам у Брусэлі падпісаў дарожную карту для забеспячэння сінхранізацыі электрасетак краін Балтыі з кантынентальнай еўрапейскай сеткай.

«Камісія заўсёды была прыхільніцай поўнай інтэграцыі сетак краін Балтыі з сеткай Еўропы і мы робім усё магчымае для садзейнічання рашучага прагрэсу ў сінхранізацыі і працуем над укараненнем стратэгічнай энэргетычнай інфраструктуры рэгіёну Балтыйскага мора», - заявіў Юнкер.

У адпаведнасці з дарожнай картай, сінхранізацыя будзе рэалізаваная не пазней 2025 года. Таксама Еўракамісія правядзе перамовы з Расеяй і Беларуссю для забеспячэння беспраблемнага адключэння.