Экс-амбасадар Расеі ў Беларусі Бабіч стаў намеснікам кіраўніка Мінэканамразвіцця РФ

Прызначэнне падпісаў прэм'ер-міністр РФ Дзмітрый Мядзведзеў.

Былы амбасадар Расеі ў Беларусі Міхаіл Бабіч прызначаны намеснікам міністра эканамічнага развіцця Расеі, паведамляе РБК.

Адпаведнае распараджэнне падпісаў кіраўнік урада РФ Дзмітрый Мядзведзеў.

Хто такі Міхаіл Бабіч

Міхаіл Бабіч прапрацаваў амбасадарам у Беларусі восем месяцаў. Яго прызначылі ў жніўні 2018 гады з пашыранымі паўнамоцтвамі - спецпрадстаўнік прэзідэнта «ў развіцці гандлёва-эканамічнага супрацоўніцтва» з Беларуссю. Ён быў адкліканы з абодвух пасад 30 красавіка пасля шэрагу публічных спрэчак з беларускім МЗС, нагадвае tut.by.

Да гэтага дыпламатам Бабіч ніколі не працаваў. Ён служыў у ВДВ і войсках КДБ, кіраваў вайсковай прамысловай карпарацыяй «Антэй», быў віцэ-прэм'ерам Падмаскоўя і Іванаўскай вобласці. У 2002-2003 гадах узначальваў урад Чачэніі, але быў адкліканы адтуль пасля канфлікту з прэзідэнтам рэспублікі Ахмата Кадыравым.

Некаторы час Бабіч быў памочнікам кіраўніка Памежнай службы ФСБ, а з 2003 года да 2011 года - дэпутатам Дзяржаўнай думы. Да прызначэння ў Менск 7 гадоў займаў пасаду паўнамоцнага прадстаўніка прэзідэнта РФ у Прыволжскай федэральнай акрузе. За час працы амбасадарам у Беларусі Бабіч паспеў перавезці ў Менск як мінімум семярых сваіх былых падначаленых з Прыволжа.

Гісторыя канфлікту Бабіча з Менскам

У Беларусі Бабіч працаваў даволі актыўна: ездзіў па рэгіёнах, аглядаў прадпрыемствы, сустрэўся з апазіцыянерамі, даваў шмат інтэрвію расейскім СМІ.

15 сакавіка падставай для першага «абмену ласкамі» паслужыла інтэрв'ю Міхаіла Бабіча агенцтву «РИА Новости», у якім ён заклікаў Беларусь вызначыцца з фарматам інтэграцыі. У гэтым жа інтэрв'ю амбасадар завочна паспрачаўся з заявамі беларускага правадыра і некалькі разоў падаў лічбы падтрымкі Расеяй Беларусі ў розных галінах.

Пасля гэтага ў беларускім МЗС Бабіча параўналі з «бухгалтарам, які дае надзею» і заявілі, што ён не зразумеў розніцы паміж незалежнай краінай і федэральнай акругай. Прэс-сакратар МЗС Беларусі Анатоль Глаза таксама параіў амбасадару Расеі паглыбіцца ў спецыфіку краіны знаходжання, пазнаёміцца з яе гісторыяй і праявіць крыху павагі.

У красавіку Міхаіл Бабіч яшчэ раз уступіў у завочную дыскусію, даволі крытычна адказаўшы кіраўніку МЗС Беларусі Уладзіміра Макею на словы пра тое, што кіраўнік урада Расеі «магчыма, не ў курсе», што Беларусь даўно адправіла расейскім калегам прапановы ў адказ аб інтэграцыі дзвюх краін.

«Лепш бы спадару Макею ўлічваць ролю Мядзведзева ў саюзнай дзяржаве», - заявіў Бабіч.

19 красавіка Бабіч яшчэ раз заявіў, што Лукашэнка аперуе недакладнымі лічбамі, калі ацэньвае канчатковы кошт БелАЭС, якую будуюць за кошт расейскага крэдыту. МЗС Беларусі ў той жа дзень заявіў, што пасол Расеі «паспяхова разбурае стасункі» паміж дзвюма краінамі.

30 красавіка Бабіча адклікалі са сваіх пасад, а амбасадарам у Беларусь прызначылі сэнатара Дзмітрыя Мезенцава.