Тэмпературныя рэкорды чэрвеньскай спёкі: у каго больш
3- 16.06.2019, 13:51
- 14,425
Беларусы дзеляцца ў сацсетках «гарачымі» фота.
Анамальная спякота ў пачатку чэрвеня ў Беларусі спарадзіла новую моду ў сацыяльных сетках - выкладваць фота вулічных тэрмометраў з тэмпературнымі рэкордамі, піша vkurier.by.
У групе «Беларусь цяпер» сацыяльнай сеткі Вконтакте 12 чэрвеня быў выкладзены фотаздымак тэрмометра, які паказвае тэмпературу 44 градусы. Здымак быў зроблены ўдзень у Лепелі.
Высветлілася, што такая спякота стаіць і ў іншых месцах нашай краіны. Карыстальнік з Лельчыц Вадзім Лісоўскі сфатаграфаваў тэрмометр, які вісіць на акне з 41 градусам спёкі.
У Бабруйску ў цені тэмпература падымалася да 40 градусаў. Фота тэрмометра з такой адзнакай выклала у сеціва Вольга Гарелька.
Незвычайны стрэлкавы тэрмометр, які паказвае 43 градусы, сфатаграфаваў Павел Кеўліч у кабіне МАЗу. Мусіць, кіроўцу аўто давялося несалодка!
Але абсалютны тэмпературны рэкорд прадэманстраваў тэрмометр, зняты ў Гародні Лізай Васільчанкай. Ён паказаў цэлых 48 градусаў!
Праўда, далёка не ўсе карыстальнікі Інтэрнэту згаджаліся з дакладнасцю такіх вымярэнняў. У каментарах паказвалася, што тэрмометры перад здымкай паспелі пабываць у печы альбо былі няспраўныя.
Дзель праўды ў гэтым ёсць: далёка не ўсюды ў Беларусі было так горача. Напрыклад, на фатаграфіі, дасланай Лідзіяй Сцепановіч з Менска, тэмпература не ўзнялася вышэй за 25 градусаў.
Але нават пры такой тэмпературы знаходзіцца удзень на дварэ неймаверна цяжка!