У Берасці 300 чалавек выйшлі на марш супраць завода АКБ

Удзельнікі шэсця ўзнялі сцяг горада.

Берасцейцы сабраліся на традыцыйнае нядзельнае кармленне галубоў. Настрой святочны, кіроўцы сігналяць у знак падтрымкі, паведамляе тэлеграм-канал «Баста».

Людзі не вераць абяцанням уладаў, абмяркоўваюць далейшыя дзеянні.

- Наша мэта - не прыпыненне працы, ні правядзенне дадатковых праверак, а закрыццё завода акумулятарных батарэй. Будзем ціснуць далей. Акцыі прадоўжацца да перамогі, - кажа адзін з удзельнікаў.

Пасля акцыі на плошчы Леніна людзі пайшлі шэсцем вуліцамі Берасця. У ім бяруць удзел блізу 300 чалавек.

«Удзельнікі шэсця ўзнялі сцяг Берасця. Далучаюцца новыя людзі», - паведамляе «Баста».

Шэсце скончылася каля кінатэатра «Беларусь».

Нагадаем, што старшыня Берасцейскага аблвыканкама Анатоль Ліс падпісаў 14 чэрвеня загад аб прыпыненні будаўніцтва акумулятарнага завода - да «ліквідацыі выяўленых парушэнняў».

Лідары пратэстаў у Берасці заявілі, што жыхары горада не задаволеныя палавіністай пастановай і акцыі прадоўжацца, пакуль праца завода не будзе цалкам спыненая.