Іран прапанаваў краінам Персідскай затокі падпісаць пакт аб ненападзе

Дэталяў гэтага пагаднення кіраўнік МЗС Ірана не раскрыў.

Іран прапанаваў краінам Персідскай затокі падпісаць пакт аб ненападзе. Пра гэта на прэс-канферэнцыі пасля сустрэчы ў Багдадзе з ірацкім міністрам замежных спраў Мухамедам Алі аль-Хакімам заявіў кіраўнік іранскага МЗС Махамад Джавад Зарыф, паведамляе тэлеканал Al Arabiya (пераклад - РБК).

Дэталяў гэтага пагаднення кіраўнік міністэрства не раскрыў. Сваю прамову на брыфінгу, паводле звестак канала, ён пачаў з таго, што «дзеянні Амерыкі супярэчаць рэзалюцыі Рады Бяспекі [ААН] пра ўжыванне сілы». Так кіраўнік іранскага замежнапалітычнага міністэрства, тлумачыць Al Arabiya, адазваўся аб планах Злучаных Штатаў узмацніць сваю вайсковую прысутнасць на Блізкім Усходзе і накіраваць туды дадатковыя войскі.

Тэгеран, адзначыў таксама на брыфінгу Зарыф, «хоча выбудаваць збалансаваныя стасункі з усімі дзяржавамі Персідскага заліва». «Нягледзячы на ўсе паведамленні і доказы, якія пацвярджаюць фінансаванне і падтрымку Іранам хусітаў, якія неаднаразова паражалі аб'екты ў Саудаўскай Арабіі, мы прапанавалі [падпісаць] пакт аб ненападзе з суседнімі краінамі Персідскай затокі», - заявіў міністр.

У чым менавіта будзе палягаць гэта пагадненне, ён не ўдакладніў, падкрэсліўшы, аднак, што ў той жа час Іран будзе «рашуча супрацьстаяць усім спробам агрэсіі, няхай гэта будзе эканамічная або ваенная».

На прэс-канферэнцыі Зарыф таксама заклікаў краіны Еўропы «выканаць свае абавязацельствы» ў рамках ядзернай угоды. Гэтыя дзяржавы, упэўнены кіраўнік іранскага МЗС, «павінны зрабіць больш для падтрымання ядзернага пагаднення». «Гутарак недастаткова», - запэўніў Зарыф. Ад еўрапейцаў ён запатрабаваў практычных дзеянняў. Сам Тэгеран, падкрэсліў міністр, гэтай дамовы яшчэ не парушаў.

Гаворка ідзе пра ядзерную ўгоду, удзельнікамі якой, акрамя Ірана, з'яўляюцца Францыя, Вялікая Брытанія, Нямеччына, Кітай і Расея. Перш у гэтай дамове таксама ўдзельнічалі ЗША, аднак летась прэзідэнт Злучаных Штатаў Дональд Трамп абвясціў аб выхадзе з яе. Свой крок ён патлумачыў тым, што Тэгеран, паводле звестак Вашынгтона, парушае ўмовы гэтай дамовы (на падставе іх Іран павінен быў абмежаваць свае ядзерныя распрацоўкі). У Міжнародным агенцтве атамнай энэргіі гэтыя звесткі не пацвердзілі. Астатнія ўдзельнікі ўгоды выказалі жаданне яе захаваць. ЗША пасля выхаду з пагаднення аднавілі ранейшыя санкцыі супраць Ірана.

У пачатку траўня Тэгеран зрэагаваў на гэта і абвясціў аб частковай адмове ад ядзернай угоды. Астатнія краіны - удзельніцы дамовы не распачалі канкрэтных крокаў, каб «кампенсаваць [шкоду ад] санкцый ЗША», растлумачылі там.

Пасля гэтага Associated Press са спасылкай на крыніцы ў Белым доме паведаміла пра тое, што, паводле звестак амерыканскай выведкі, Іран нібыта размяшчае ля сваіх берагоў на маламерных суднах ракеты. Гэта, адзначалі суразмоўцы AP, выклікае ў ЗША асцярогі з нагоды таго, што Тэгеран можа рыхтавацца да нападу на амерыканскія сілы або інтарэсы ў рэгіёне.

У сувязі з гэтым Злучаныя Штаты пасля вызначылі ўзмацніць сваю місію на Блізкім Усходзе дадатковымі бамбавікамі і зенітнымі ракетнымі комплексамі Patriot. Акрамя гэтага, 24 траўня, Трамп абвясціў аб адпраўцы ў рэгіён дадаткова 1,5 тысячы вайскоўцаў.