21 краіна ЕЗ выбірае новы склад Еўрапарламента
- 26.05.2019, 10:53
- 5,032
Еўрапейскія выбары з'яўляюцца найбуйнейшымі ў свеце паводле колькасці выбарцаў пасля Індыі.
У нядзелю, 26 траўня, грамадзяне 21 краіны Еўразвязу галасуюць на выбарах у Еўрапейскі парламент.
Пра гэта паведамляе «Европейская правда».
Еўрапейскія выбары з'яўляюцца найбуйнейшымі ў свеце па колькасці выбарцаў пасля Індыі. Больш за 420 мільёнаў чалавек у краінах ЕЗ маюць права абіраць 751 сябра парламента.
У нядзелю сваіх прадстаўнікоў выбіраюць грамадзяне 21 краіны ЕЗ. Выбарцы ў 7 краінах - Нідэрландах, Вялікабрытаніі, Ірландыі, Чэхіі, Латвіі, Мальце і Славакіі - ужо прагаласавалі ў папярэднія дні.
Участкі пачалі працаваць а 7:00 раніцы ва ўсходніх дзяржавах блока. Галасаванне працягнецца да 23:00, калі закрыюцца ўчасткі ў Італіі.
Еўрадэпутатаў выбіраюць паводле прапарцыйнай сістэмы, а далей дэпутаты ад партый розных дзяржаў аб'ядноўваюцца ў партыйныя групы.
Паводле прагнозаў сацыялагічных апытанняў, правы еўраскептычны фланг парламента можа істотна ўзрасці, а цэнтрысцкія партыі паменшаць сваё прадстаўніцтва. Правыя папулісты лідзіруюць у апытаннях двух з чатырох найбуйнейшых краін-сябраў - Італіі і Вялікабрытаніі, якія выходзяць з Еўразвязу. Таксама яны прэтэндуюць на перамогу ў Францыі.
Зрэшты, нечаканыя вынікі таксама магчымыя. Напрыклад, у Нідэрландах перамогу прагназавалі папулістам, а лідарамі, згодна з экзіт-полам, сталі праеўрапейскія партыі. У Ірландыі, паводле вынікаў экзіт-полу, таксама лідзіруюць праеўрапейскія партыі.
Першы агрэгаваны прагноз складу Еўрапейскага парламента можна чакаць неўзабаве пасля 21:15 паводле Менску.